काठमाडौं । प्रतिनिधिसभाको आजको बैठक सुरु भएको छ। बैठकमा प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्रको व्यहोरा सभामुख डोलप्रसाद अर्यालले पढेर सुनाउने सम्भावित कार्यसूची रहेको छ।
बैठकमा कानुन, न्याय तथा संसदीय मामिला मन्त्री सोविता गौतमले ‘नेपाल कानुन आयोग (पहिलो संशोधन) विधेयक, २०८३’ प्रस्तुत गर्न अनुमति माग्ने तथा विधेयक प्रस्तुत गर्ने कार्यसूची रहेको छ।
त्यस्तै, मन्त्री गौतमले ‘मेलमिलापसम्बन्धी (दोस्रो संशोधन) विधेयक, २०८३ माथि विचार गरियोस्’ भन्ने प्रस्ताव प्रस्तुत गर्नेछिन्।
बैठकमा ‘एसियाली विधायिकी संस्थाहरुको परिषद्को सदस्यता प्राप्त गर्नेसम्बन्धी प्रस्ताव’ पनि सभासमक्ष पेस गर्ने कार्यसूची रहेको संघीय संसद् सचिवालयका महासचिव पद्मप्रसाद पाण्डेयले जानकारी दिएका छन्।
काठमाडौं । रसुवाको भोटेकोशी नदीमा आएको बाढीपछि राहत तथा उद्धारका लागि सरकारले आह्वान गरेको प्रधानमन्त्री राहत कोषमा करिब १२ अर्ब रुपैयाँ मौज्दात रहेको प्रधानमन्त्री तथा मन्त्रिपरिषद्को कार्यालयले जनाएको छ।
प्रधानमन्त्रीको सचिवालयका अनुसार हाल कोषमा कुल ११ अर्ब ९८ करोड ९७ लाख ९६ हजार ८४ रुपैयाँ मौज्दात रहेको छ।
कोषमा जम्मा भएको रकममध्ये नौवटा वाणिज्य बैंकका खातामा ८ अर्ब ७८ करोड ८२ लाख ५८ हजार ३०४ रुपैयाँ रहेको छ। त्यस्तै, दुईवटा वाणिज्य बैंकका खातामा २ करोड ११ लाख ४३ हजार ४२७ अमेरिकी डलर मौज्दात रहेको सचिवालयले जनाएको छ।
बाढी प्रभावित क्षेत्रमा तत्काल राहत तथा उद्धारका लागि प्रधानमन्त्री राहत कोषबाट एक अर्ब रुपैयाँ राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई निकासा भइसकेको छ।
भोटेकोशी नदीमा आएको बाढीपछि सरकारले प्रभावित क्षेत्रमा राहत, उद्धार तथा पुनर्स्थापनाका लागि सहयोग गर्न स्वदेश तथा विदेशमा रहेका व्यक्ति तथा संघसंस्थालाई सार्वजनिक आह्वान गरेको थियो। सरकारको आह्वानपछि प्राप्त सहयोग रकम प्रधानमन्त्री राहत कोषमा जम्मा गरिएको हो।
सरकारले कोषमा संकलित रकम विपद् प्रभावित क्षेत्रमा राहत, उद्धार तथा पुनर्स्थापनाका काममा उपयोग गरिने जनाएको छ।
काठमाडौं। प्रतिनिधिसभाको अर्थ समितिले रसुवामा आएको बाढीबाट अर्थतन्त्रमा परेको प्रभाव तथा जलवायु वित्तसँग सम्बन्धित विषयमा अध्ययन तथा विश्लेषण गर्ने भएको छ। अध्ययनका लागि सांसद सुशिल खड्काको संयोजकत्वमा सात सदस्यीय उपसमिति गठन गरिएको हो। सिंहदरबारमा आज बसेको अर्थ समितिको बैठकले खड्काको संयोजकत्वमा उपसमिति गठन गरेको हो। उपसमितिका सदस्यहरूमा सांसद नरेन्द्रकुमार केरुङ, परशुराम तामाङ, डा. पुष्पराज कँडेल, लिमा अधिकारी, पुष्प चौधरी र सुशान्त वैदिक रहेका छन्। समितिका सभापति डा. कृष्णहरि बुढाथोकीका अनुसार उपसमितिलाई रसुवा बाढीले अर्थतन्त्रमा पारेको प्रभाव तथा जलवायु वित्तसम्बन्धी विषयमा अध्ययन गरी आगामी असोज २ गतेभित्र प्रतिवेदन पेस गर्ने कार्यादेश दिइएको छ।
काठमाडौं। प्रधानमन्त्री वालेन्द्र (बालेन) शाहले रसुवाको भोटेकोशी नदीमा गत भदौ १० गते आएको बाढीपछि उत्पन्न परिस्थितिबारे तीनवटै सुरक्षा निकायका प्रमुखसँग उच्चस्तरीय छलफल सुरु गरेका छन्। बाढी प्रभावित क्षेत्रमा भइरहेको खोज तथा उद्धार, राहत वितरण, उपचार तथा समग्र सुरक्षा अवस्थाबारे जानकारी लिन प्रधानमन्त्री शाहले सुरक्षा निकायका प्रमुखहरूसँग छलफल गरेका हुन्। सिंहदरबारस्थित प्रधानमन्त्री तथा मन्त्रिपरिषद्को कार्यालयमा प्रधानमन्त्री शाहले हाल नेपाली सेनाका प्रधानसेनापति अशोकराज सिग्देलसँग छलफल गरिरहेका छन्। प्रधानसेनापति सिग्देलसँगको छलफलपछि प्रधानमन्त्री शाहले आजै नेपाल प्रहरीका महानिरीक्षक दानबहादुर कार्की तथा सशस्त्र प्रहरी बल, नेपालका महानिरीक्षक नारायणदत्त पौडेलसँग पनि छलफल गर्ने कार्यक्रम रहेको छ।
काठमाडौं । अमेरिका र इरानबीच छ महिनाभन्दा लामो समयदेखि जारी युद्धमा तनाव फेरि चर्किएको छ। अमेरिकी सेनाले मंगलबार आफ्ना युद्धपोतमा भएको पछिल्लो क्षेप्यास्त्र आक्रमणको जवाफमा इरानका थप पाँचवटा तेल ट्यांकर ध्वस्त पारेको जनाएको छ।
अमेरिकी कारबाहीपछि इरानले पनि जोर्डनमा रहेका अमेरिकी लक्ष्यतर्फ क्षेप्यास्त्र प्रहार गरेको इरानी सरकारी सञ्चारमाध्यमले जनाएका छन्।
जोर्डनको सेनाका अनुसार उसको हवाई प्रतिरक्षा प्रणालीले आफ्नो भूमितर्फ प्रहार गरिएका १८ वटा ब्यालेस्टिक क्षेप्यास्त्र आकाशमै रोकेको थियो। थप दुईवटा क्षेप्यास्त्र भने मानव बस्ती नभएका क्षेत्रमा खसेका थिए। घटनामा मानवीय क्षतिको कुनै विवरण प्राप्त नभएको जोर्डनले जनाएको छ।
अमेरिकाको निकट सहयोगी जोर्डनमा अमेरिकी सेनाको उपस्थिति रहेकाले त्यहाँका सैन्य अखडाहरू यसअघि पनि इरानी आक्रमणको निशानामा पर्दै आएका छन्।
इरानमाथि अमेरिकाको थप प्रतिबन्ध
ट्रम्प प्रशासनले मंगलबार इरानको हवाई क्षेत्रमा थप प्रतिबन्धसमेत लगाएको छ। इरानलाई बाँकी रहेका व्यापारिक साझेदारबाट अलग पार्ने प्रयासस्वरूप दुई दर्जनभन्दा बढी व्यावसायिक तथा निजी विमान सेवा र विदेशी मालवाहक सेवा प्रदायकलाई लक्षित गरिएको जनाइएको छ।
अमेरिका–इरान संघर्षमा हर्मुज जलमार्ग महत्वपूर्ण क्षेत्र बनेको छ। युद्ध सुरु हुनुअघि विश्वमा खपत हुने कुल तेलमध्ये करिब पाँच भागको एक भाग यही मार्ग हुँदै ओसारपसार हुने गरेको थियो।
यस क्षेत्रमा जारी तनावका कारण विश्व बजारमा ऊर्जा मूल्यसमेत बढिरहेको छ। मंगलबार अन्तर्राष्ट्रिय बजारमा ब्रेन्ट कच्चा तेलको मूल्य केही समयका लागि प्रतिब्यारेल ९९.४६ अमेरिकी डलरसम्म पुगेको थियो।
यसअघि शनिबार पनि अमेरिकी सेनाले इरानका तीनवटा तेल ट्यांकर ध्वस्त पारेको थियो। इरानको इस्लामिक क्रान्तिकारी सुरक्षा बलले अमेरिकी विमानवाहक युद्धपोत र विध्वंसक युद्धपोतलाई ब्यालेस्टिक क्षेप्यास्त्रमार्फत आक्रमण गर्ने प्रयास गरेपछि अमेरिकी सेनाले जवाफी कारबाही गरेको जनाएको थियो।
त्यसपछि इरानले हर्मुज जलमार्गनजिकबाट आवतजावत गर्ने निश्चित जहाजलाई लक्षित गर्दै नयाँ निषेधित क्षेत्र घोषणा गर्ने तयारी गरेको जनाएको छ।
अमेरिकी विदेशमन्त्री मार्को रुबियोले इरानका आक्रमणलाई कुनै जवाफबिनै छाड्न नसकिने बताएका छन्। लगातारका आक्रमण र जवाफी कारबाहीले अमेरिका–इरान युद्ध थप गहिरिँदै जाने तथा यसको असर विश्व ऊर्जा बजारमा समेत पर्न सक्ने चिन्ता बढेको छ।
काठमाडौँ । रसुवा बाढी तथा त्यसबाट प्रभावित विभिन्न जिल्लामा मृत्यु हुनेको संख्या १ हजार ३६७ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले बुधबार बिहान ११ बजे सार्वजनिक गरेको खोज, उद्धार तथा राहतसम्बन्धी विवरणअनुसार विभिन्न जिल्लाबाट हालसम्म १ हजार ३६७ जनाको मृत्यु भएको विवरण प्राप्त भएको हो।
प्राधिकरणका अनुसार सबैभन्दा धेरै शव चितवनमा फेला परेका छन्। जिल्लागत विवरण यसप्रकार छ:
जिल्ला/स्थान
फेला परेका शव
चितवन
३६३
नवलपरासी पूर्व
२२६
नवलपरासी पश्चिम
२२२
नुवाकोट
१९७
रसुवा
१७४
गोरखा
७५
धादिङ
७०
तनहुँ
३८
काठमाडौँमा उपचारका क्रममा
२
जम्मा
१,३६७
हालसम्म १०२ वटा शवको सनाखत गरी आफन्तलाई बुझाइएको प्राधिकरणले जनाएको छ। सनाखत हुन बाँकी शवका लागि सम्बन्धित जिल्ला प्रहरी कार्यालयमा दुईवटा फोटो र नाता प्रमाणित गर्ने कागजातसहित नमुना दिन सकिने व्यवस्था गरिएको छ।
बाढी तथा अन्य विपद्का कारण करिब ५ हजार १३२ जना अझै सम्पर्कविहीन रहेको प्राधिकरणले जनाएको छ। जिल्लागत तथा समूहगत विवरण यसप्रकार छ:
स्थान/समूह
सम्पर्कविहीन
रसुवा
२,८६०
नुवाकोट
१,७८७
विदेशी पर्यटक
५८७
जम्मा
५,१३२
रसुवाबाट मात्रै २ हजार ८६० जना सम्पर्कविहीन छन्। तीमध्ये रसुवा जिल्लाका १ हजार ३९३, अन्य जिल्लाका १ हजार २८६, नेपाली सेनाका ४५, नेपाल प्रहरीका २५, सशस्त्र प्रहरीका १२, सरकारी कर्मचारी ७३ तथा बैंक तथा वित्तीय संस्थाका २६ कर्मचारी रहेका छन्।
त्यस्तै, नुवाकोटबाट १ हजार ७८७ जना सम्पर्कविहीन रहेको प्राधिकरणले जनाएको छ। तीमध्ये नुवाकोटका ६५१ र रसुवाबाहेक अन्य जिल्लाका १ हजार १३६ जना छन्। यस्तै, करिब ५८७ जना विदेशी पर्यटकसमेत सम्पर्कविहीन रहेको विवरणमा उल्लेख छ। सनाखत भएका शवको संख्या सम्पर्कविहीनको संख्याबाट घटाइएको प्राधिकरणले जनाएको छ।
विपद् प्रभावित क्षेत्रबाट हालसम्म १३ हजार ६४६ जनाको उद्धार गरिएको छ। उद्धार तथा राहत कार्यमा सुरक्षा निकायका २१ हजार १८५ जना परिचालन भएका छन्।
उद्धार तथा राहतमा परिचालित सुरक्षा निकाय
जनशक्ति
नेपाल प्रहरी
७,९७५
नेपाली सेना
९,००७
सशस्त्र प्रहरी बल
४,२०३
जम्मा
२१,१८५
विभिन्न ३७ वटा होल्डिङ सेन्टरमा ३ हजार ६२८ जना राखिएका छन्। तीमध्ये रसुवामा ७३३, नुवाकोटमा २ हजार ६९९ र धादिङमा १९६ जना रहेका छन्।
त्यसैगरी, विभिन्न १० वटा अस्पतालमा ३२९ जनाको उपचार गरिएको छ। उपचारपछि २५२ जना डिस्चार्ज भइसकेका छन्।
उपचार तथा सेवा
संख्या
विभिन्न अस्पतालमा उपचार
३२९
उपचारपछि डिस्चार्ज
२५२
नेपाली सेनाबाट उपचार सेवा
३,५३५
सशस्त्र प्रहरी बलबाट उपचार सेवा
३,२८७
प्राधिकरणका अनुसार उद्धार, उपचार तथा राहत कार्यलाई निरन्तरता दिइएको छ।
काठमाडौँ । बाढीका कारण आपूर्ति प्रणाली प्रभावित हुँदा काठमाडौँ उपत्यकामा एलपी ग्यासको आपूर्ति असहज बनेको छ। यस्तो अवस्थामा उपभोक्तालाई सहज रूपमा ग्यास उपलब्ध गराउन उद्योग, वाणिज्य तथा आपूर्तिमन्त्री गौरीकुमारी यादवले सम्बन्धित निकायलाई आवश्यक व्यवस्था मिलाउन निर्देशन दिएकी छन्।
मन्त्री यादवले काठमाडौँ उपत्यकाभित्र लागू हुने गरी जुनसुकै कम्पनीको सिलिन्डर साटेर ग्यास उपलब्ध गराउन निर्देशन दिएकी हुन्। उनका अनुसार कुनै एक कम्पनीको ग्यास सिलिन्डर उपलब्ध नभएको अवस्थामा अर्को कम्पनीको सिलिन्डरसँग समान मूल्यमा साटासाट (इन्टरचेञ्ज) गरी उपभोक्तालाई ग्यास उपलब्ध गराउने व्यवस्था मिलाउनुपर्नेछ।
मन्त्रीको सचिवालयले बुधबार जारी गरेको जानकारीअनुसार यो व्यवस्था लागू भएपछि उपभोक्ताले आफूले नियमित रूपमा प्रयोग गर्दै आएको ब्रान्डको सिलिन्डर तत्काल उपलब्ध नभए पनि अन्य कम्पनीको सिलिन्डरमार्फत सहज रूपमा ग्यास प्राप्त गर्न सक्नेछन्।
प्राकृतिक विपद्का रूपमा आएको बाढीका कारण उत्पन्न आपूर्ति समस्यालाई तत्काल सम्बोधन गर्दै उपभोक्तालाई राहत प्रदान गर्ने उद्देश्यले यस्तो व्यवस्था गरिएको सचिवालयले जनाएको छ।
काठमाडौँ । किष्ट शिक्षण अस्पतालअन्तर्गतको किष्ट प्रत्यारोपण केन्द्रमा ५ वर्षीया बालिकाको सफल कलेजो प्रत्यारोपण गरिएको छ। प्रत्यारोपणपछि आवश्यक उपचार र चिकित्सकीय निगरानी पूरा भएपछि उनलाई अस्पतालबाट डिस्चार्ज गरिएको अस्पतालले जनाएको छ।
बालिकाकी ३३ वर्षीया आमाले आफ्नो कलेजोको केही हिस्सा छोरीलाई दान गरेकी हुन्। प्रत्यारोपणपछि बालिकाको स्वास्थ्य अवस्था स्थिर र सन्तोषजनक रहेको चिकित्सकहरूले बताएका छन्।
अस्पतालका अनुसार प्रत्यारोपण शल्यक्रियाका लागि विशेषज्ञ चिकित्सक, सघन उपचार तथा आवश्यक पूर्व र प्रत्यारोपणपछिको उपचारलाई समन्वय गरेर सेवा दिइएको थियो।
५ वर्षीया बालिकामा गरिएको यो सफल प्रत्यारोपणलाई किष्टले आफ्नो प्रत्यारोपण सेवाको महत्वपूर्ण उपलब्धिका रूपमा लिएको छ। केन्द्रले बालबालिकासहित जटिल बिरामीका लागि नेपालमै उन्नत प्रत्यारोपण सेवा विस्तार गर्ने जनाएको छ।
काठमाडौँ । मनसुनको प्रभाव अझै कायम रहेकाले देशका अधिकांश भूभागमा मौसम बदली रहने भएको छ। जल तथा मौसम विज्ञान विभागका अनुसार मनसुनको न्यून चापीय रेखा सरदर स्थान आसपास रहेकाले विभिन्न प्रदेशमा हल्कादेखि मध्यम वर्षा र केही स्थानमा चट्याङसहित वर्षा भइरहेको छ। विभागले मनसुनी गतिविधि सक्रिय रहेकाले यात्रा तथा बाहिरी काम गर्दा आवश्यक सावधानी अपनाउन आग्रह गरेको छ।
कोशी प्रदेशमा अधिकांश भूभागमा बादल लाग्नेछ। केही स्थानमा मेघगर्जन र चट्याङसहित मध्यम वर्षा हुन सक्नेछ। विराटनगरमा अधिकतम तापक्रम ३४–३६°C आसपास रहने र वर्षाको सम्भावना ४० प्रतिशत रहेको विभागको विवरण छ।
मधेश प्रदेशमा मौसम सामान्यतया बदली रहनेछ। केही स्थानमा वर्षा र चट्याङको सम्भावना छ। जनकपुरमा अधिकतम तापक्रम ३५–३७°C पुग्न सक्ने विभागले जनाएको छ।
बागमती प्रदेशमा पहाडी तथा आसपासका क्षेत्रमा बदलीसँगै वर्षाको सम्भावना छ। काठमाडौँ उपत्यकामा पनि वर्षा हुन सक्ने देखिएको छ। काठमाडौँमा आज अधिकतम २९–३१°C र न्यूनतम १९–२१°C रहने अनुमान छ।
गण्डकी प्रदेशमा पहाडी तथा हिमाली क्षेत्रमा बदली रहनेछ भने केही स्थानमा मेघगर्जनसहित वर्षा हुन सक्नेछ। पोखरामा वर्षाको सम्भावना ४० प्रतिशत रहेको विभागले जनाएको छ।
लुम्बिनी प्रदेशमा अधिकांश क्षेत्रमा बादल लाग्ने र केही स्थानमा चट्याङसहित वर्षा हुने सम्भावना छ। भैरहवामा अधिकतम तापक्रम ३४–३६°C आसपास रहने अनुमान गरिएको छ।
कर्णाली प्रदेशमा पहाडी तथा हिमाली भूभागमा मौसम बदली रहनेछ। केही स्थानमा वर्षा र मेघगर्जन हुन सक्ने भएकाले सतर्कता अपनाउनुपर्ने देखिन्छ। वीरेन्द्रनगरमा अधिकतम तापक्रम ३३–३५°C आसपास रहने विभागको अनुमान छ।
सुदूरपश्चिम प्रदेशमा पहाडी तथा हिमाली क्षेत्रमा सामान्य बदली रहनेछ भने तराई क्षेत्रमा आंशिक बदली देखिनेछ। केही स्थानमा वर्षा हुन सक्ने विभागले जनाएको छ। धनगढीमा अधिकतम तापक्रम ३४–३६°C र वर्षाको सम्भावना ३० प्रतिशत रहेको छ।
समग्रमा मनसुन सक्रिय रहेकाले वर्षासँगै चट्याङ पर्ने सम्भावना रहेका क्षेत्रमा विशेष सावधानी अपनाउनुपर्ने देखिएको छ। मौसम तथा बाढीसम्बन्धी पूर्वसूचनाका लागि विभागले टोल–फ्री नम्बर ११५५ उपलब्ध गराएको छ।
काठमाडौँ । नेकपा एमालेका सचिव महेश बस्नेतले गत वर्ष भदौ २४ गते भएको हिंसा, आगजनी र तोडफोडमा संलग्नलाई कारबाही गर्न माग गरेका छन्। उनले दोषीमाथि कानुनी कारबाही नभएसम्म आफ्नो आवाज नरोकिने बताएका छन्।
घटनाको एक वर्ष पुगेको दिन सामाजिक सञ्जालमा आफ्नो घरमा लुटपाट र आगजनी भइरहेको भिडियो सार्वजनिक गर्दै बस्नेतले त्यस दिन राज्यका संरचनादेखि निजी सम्पत्तिसम्म ठूलो क्षति भएको स्मरण गरेका छन्।
उनका अनुसार घटनाबाट पीडित सयौँ नागरिकले अहिलेसम्म न्याय र क्षतिपूर्ति पाउन सकेका छैनन्। दोषीमाथि कारबाही नहुँदा आफू थप आक्रोशित भएको उनले बताएका छन्।
भदौ २४ को घटनापछि बनेको राजनीतिक सत्ताले देशलाई थप अन्योलतर्फ धकेलेको आरोप लगाउँदै बस्नेतले घटनामा संलग्न व्यक्ति वा समूह जुनसुकै राजनीतिक आवरणमा भए पनि कानुनी दायरामा ल्याउनुपर्ने बताएका छन्।
उनले भदौ २४ लाई नेपालको इतिहासको ‘कालो दिन’ भन्दै न्याय र जवाफदेहिता कायम हुनुपर्नेमा जोड दिएका छन्।
