काठमाडौँ । नदी किनारका बस्ती हटाइएपछि विस्थापित भएका सुकुमबासीहरू अहिले कीर्तिपुरको सुन्दरीघाटस्थित एक आश्रयस्थलमा बसिरहेका छन्। थापाथली र गैरीगाउँबाट हटाइएका उनीहरूलाई अस्थायी रूपमा राखिएको भए पनि भविष्यको अन्योलले उनीहरू चिन्तित छन्।
अहिले झण्डै दुई सयजति मानिस एउटै स्थानमा आश्रित छन्। खानपान र स्वास्थ्य जाँचको व्यवस्था भए पनि स्थायी बसोबासको टुंगो नलाग्दा उनीहरूमा असुरक्षा बढ्दै गएको देखिन्छ। विशेषगरी बालबालिकाहरू विद्यालय र साथीभाइबाट टाढा हुँदा मानसिक रूपमा प्रभावित भएका छन्।
आश्रयस्थलमा भेटिएका महिलाहरू भन्छन्, “अहिले खान–बस्न पाइरहेका छौँ, तर कहिलेसम्म अर्काको भरमा बस्ने?” यही प्रश्नले उनीहरूको दैनिक जीवनमा चिन्ता थपिरहेको छ।
सरकार र सम्बन्धित निकायले दीर्घकालीन समाधान नदिएसम्म यस्ता अस्थायी व्यवस्थाले मात्र समस्या समाधान नहुने उनीहरूको गुनासो छ।
