काठमाडौँ । राष्ट्रिय मानव अधिकार आयोगले सार्वजनिक गरेको जेनजी आन्दोलनसम्बन्धी प्रतिवेदनप्रति अभियन्ता रक्षा बमले तीव्र असन्तुष्टि व्यक्त गरेकी छन् । प्रतिवेदनलाई आधार बनाएर लोकतान्त्रिक आवाज उठाउने व्यक्तिहरूमाथि राजनीतिक निशाना साध्ने प्रयास भइरहेको आरोप उनले लगाएकी हुन्।
बुधबार साँझ सामाजिक सञ्जालमार्फत धारणा सार्वजनिक गर्दै बमले सरकारलाई अनुसन्धान प्रक्रियामा निष्पक्ष र जिम्मेवार बन्न आग्रह गरिन्। सरकारको नियतमाथि सीधा प्रश्न उठाउँदै उनले न्याय र अन्याय छुट्याउने वास्तविक उद्देश्य भए निष्पक्ष अनुसन्धान अघि बढाउन चुनौती दिएकी छन्।
उनले लेखेकी छन्, “यदि सरकारको उद्देश्य सत्य खोज्नु हो भने अनुसन्धान गर। होइन भने आयोगको प्रतिवेदनलाई आधार बनाएर प्रारम्भिक बयान वा सोधपुछबिनै नाम जोड्दै आन्दोलनलाई अपराधीकरण गर्ने काम बन्द गर।”
रक्षा बमले राज्यका बेथिति र असन्तुष्टिविरुद्ध स्वतःस्फूर्त रूपमा सडकमा उत्रिएका युवाहरूलाई हिंसात्मक गतिविधिमा संलग्न समूहसँग एउटै तराजुमा राख्नु अन्यायपूर्ण हुने बताएकी छन्।
पूर्वप्रधानमन्त्री सुशीला कार्की र पूर्वगृहमन्त्री ओमप्रकाश अर्यालजस्ता व्यक्तित्वहरूको नाम प्रतिवेदनमा समावेश गरिएको विषयप्रति पनि उनले आपत्ति जनाएकी छन्। संकटको घडीमा लोकतन्त्र, संविधान र राष्ट्रका पक्षमा योगदान दिएका व्यक्तिहरूलाई राजनीतिक स्वार्थको खेलमा तान्न नहुने उनको भनाइ छ।
मानव अधिकार आयोगले बुधबार जेनजी आन्दोलनसम्बन्धी प्रतिवेदन सार्वजनिक गरेपछि त्यसमा नाम समेटिएका केही व्यक्तिहरूले प्रतिवेदनलाई राजनीतिक पूर्वाग्रह र प्रतिशोधको दृष्टिले हेर्न थालेका छन्।
