काठमाडौँ । प्रतिनिधिसभाको आजको बैठक सम्बन्धित मन्त्रीको अनुपस्थितिलाई लिएर उठेको प्रश्नपछि १५ मिनेटका लागि स्थगित गरिएको छ।
विनियोजन विधेयक, २०८३ अन्तर्गत विभिन्न मन्त्रालयगत शीर्षकमाथि छलफल चलिरहेका बेला सम्बन्धित मन्त्री बैठकमा उपस्थित नरहेको विषयमा सांसदहरूले ध्यानाकर्षण गराएका थिए। त्यसक्रममा सांसद गोपाल शर्माले संसद् नियमावलीअनुसार सम्बन्धित मन्त्रीको उपस्थितिबिनै सो मन्त्रालयसँग सम्बन्धित शीर्षकमाथि छलफल अगाडि बढाउन नमिल्ने भन्दै आपत्ति जनाए।
सांसद शर्माको ध्यानाकर्षणपछि सभामुखले नियमावलीको व्यवस्थाबारे छलफल र आवश्यक समन्वयका लागि बैठक १५ मिनेटका लागि स्थगित गरेका हुन्।
प्रतिनिधिसभामा हाल आगामी आर्थिक वर्षका लागि प्रस्तुत विनियोजन विधेयकमाथि मन्त्रालयगत बजेट तथा कार्यक्रमबारे विस्तृत छलफल जारी छ। यस्ता छलफलका क्रममा सम्बन्धित मन्त्रीको उपस्थितिलाई जवाफदेहिता र संसदीय उत्तरदायित्वसँग जोडेर हेरिने गरिन्छ।
