काठमाडौँ । मंगलबार सेयर बजार सामान्य अंकले घट्दै बन्द भएको छ। नेपाल स्टक एक्सचेन्ज (नेप्से) परिसूचक ६.३१ अंकले घटेर २७०५.४५ विन्दुमा झरेको हो।
अघिल्लो दिन सोमबार पनि नेप्से १२.२६ अंकले घटेर २७११.७६ विन्दुमा बन्द भएको थियो। लगातार दोस्रो दिनको गिरावटले बजारमा दबाब कायम रहेको देखिएको छ।
मंगलबार ३५५ कम्पनीका १ करोड ७ लाख ८ हजार ५९६ कित्ता सेयर किनबेच हुँदा कुल कारोबार रकम ४ अर्ब ४ करोड ७८ लाख ५८ हजार ८४ रुपैयाँ पुगेको नेपाल स्टक एक्सचेन्जले जनाएको छ।
कारोबार रकमका आधारमा आँखु खोला जलविद्युत कम्पनी शीर्ष स्थानमा रह्यो, जसको करिब ३१ करोड रुपैयाँ बराबरको कारोबार भयो। त्यसपछि सिद्धार्थ बैंकको १८ करोड, रिलायन्स स्पिनिङ मिल्सको १५ करोड, रावा इनर्जी डेभलपमेन्टको १३ करोड तथा बुंगल हाइड्रोको १२ करोड बराबरको कारोबार भएको छ।
यस दिन सोपान फर्मास्युटिकल्स र अपोलो हाइड्रोपावरको सेयर सकारात्मक सर्किट लेभलमा पुगेका छन्।
समग्रमा ८० वटा स्टकको मूल्य बढ्दा १७७ वटा घटेका छन् भने १५ वटा स्थिर रहेका छन्। अधिकांश समूहगत सूचक नकारात्मक रहँदा बजारमा बिक्री दबाब देखिएको छ।
उपसमूहगत रूपमा म्युचुअल फण्ड र ट्रेडिङ समूहबाहेक अन्य सबै समूह सूचक घटेका छन्।
