काठमाडौं । सामाजिक सञ्जालमा खुकुरी देखाई एक युवतीलाई कुटपिट गरेको भिडियो पोस्ट गरेको आरोपमा एक युवक लागूऔषधसहित पक्राउ परेका छन् भने घटनासँग सम्बन्धित थप एक जनालाई पनि प्रहरीले नियन्त्रणमा लिएको छ।
तुलसीपुर उपमहानगरपालिका–२ भंके बस्ने २४ वर्षीय रमेश ठाडा मगरले करिब तीन महिनाअघि एक युवतीलाई जंगल क्षेत्रमा लगेर खुकुरी देखाउँदै डरधम्की दिई कुटपिट गरेको आरोप लागेको छ। सोही घटनाको भिडियो उनले मंगलबार साँझ आफ्नै फेसबुक आईडीमार्फत सार्वजनिक गरेको प्रहरीले जनाएको छ।
भिडियो सार्वजनिक भएलगत्तै इलाका प्रहरी कार्यालय तुलसीपुरबाट खटिएको टोलीले मंगलबार राति करिब २२:४० बजे उनलाई आफ्नै घरबाट नियन्त्रणमा लिएको हो।
प्रहरीका अनुसार नियन्त्रणका क्रममा उनको साथबाट विभिन्न प्रकारका लागूऔषधजन्य ट्याब्लेटहरू बरामद गरिएको छ।
घटनासम्बन्धी अनुसन्धानका क्रममा तुलसीपुर–२ बालापुरका २१ वर्षीय जिबराज खत्रीलाई समेत नियन्त्रणमा लिइएको प्रहरीले जनाएको छ। पक्राउ परेका दुवै जनामाथि थप अनुसन्धान भइरहेको छ।
