काठमाडौँ । बेलायत र रुसबीच बढ्दो तनावकै बीच इङलिस च्यानलमा मंगलबार बिहान एक असामान्य समुद्री घटना भएको छ। रुसी युद्धपोत नजिक पुगेको बेलायती निजी याटमाथि चेतावनीस्वरूप गोली चलाइएको दाबी गरिएको छ।
घटना बिहान करिब ११:४० बजे आइल अफ वाइटबाट करिब २० माइल दक्षिण र फ्रान्सको नोर्मान्डी तटबाट करिब ४० माइल उत्तरतर्फको समुद्री क्षेत्रमा भएको बताइएको छ।
‘ब्राइट फ्युचर’ नामक निजी याट रुसी युद्धपोत एडमिरल ग्रिगोरोभिच नजिक पुगेपछि तनाव उत्पन्न भएको हो। बेलायती स्रोतहरूले याट नजिकिएपछि रुसी पक्षले एकभन्दा बढी चेतावनी गोली चलाएको दाबी गरेका छन्।
तर रुसी रक्षा मन्त्रालयले भने फरक दाबी गरेको छ। मन्त्रालयका अनुसार याट ‘खतरनाक मार्ग’ मा प्रवेश गरेको, बारम्बार सम्पर्क गर्ने प्रयास गरिए पनि प्रतिक्रिया नआएको र संकेतका लागि रकेट प्रक्षेपण गरिएपछि मात्र याट झण्डै १५० मिटर दूरीमा पुगेकाले चेतावनी गोली चलाइएको हो।
याटमा रहेका बेलायती अवकाशप्राप्त दम्पती जेन केल्भी र एलन केल्भीले रुसी दाबी अस्वीकार गरेका छन्। जेन केल्भीका अनुसार युद्धपोतले पाँच पटक हर्न बजाएपछि उनीहरूले दिशा परिवर्तन गरेका थिए र कुनै टक्करको जोखिम थिएन।
उनले भने, “उनीहरूले न त रेडियोमार्फत सम्पर्क गरे, न त फ्लेयर प्रक्षेपण भयो। हामी उनीहरूसँग ठोक्किने अवस्थामा थिएनौं। गोली चलेपछि मात्र स्थिति गम्भीर बनेको हो।”
घटनामा कुनै मानवीय क्षति वा भौतिक नोक्सानी भएको छैन। तर यसले इङलिस च्यानलमा सैन्य र नागरिक जहाजबीचको संवेदनशीलता फेरि उजागर गरेको छ।
