काठमाडौं । रुपन्देहीको कोटहीमाई गाउँपालिका कार्यालयमा नदीजन्य पदार्थ उत्खनन् तथा ठेक्कासम्बन्धी अनियमितताको आशंकामा अख्तियार दुरुपयोग अनुसन्धान आयोगले छापा मारेर कागजपत्र नियन्त्रणमा लिएको छ।
बुटवलस्थित आयोगको कार्यालयबाट खटिएको टोलीले मंगलबार उजुरीका आधारमा उक्त छापा मारेको हो। प्रमुख प्रशासकीय अधिकृत सतेन्द्र यादवका अनुसार ठेक्कासम्बन्धी सम्पूर्ण कागजातको प्रतिलिपि अख्तियारले लिएर गएको छ।
जानकारीअनुसार वडा नम्बर–५ बेनीघाट क्षेत्रमा नमुना कन्स्ट्रक्सनले करिब १६ लाख रुपैयाँमा १ लाख ७७ हजारभन्दा बढी घनफिट नदीजन्य पदार्थ उत्खनन् गर्ने ठेक्का पाएको थियो। तर अनुमति दिएको स्थानभन्दा फरक ठाउँमा उत्खनन् तथा घाटगद्दी गरिएको भेटिएको बताइएको छ।
अख्तियारको प्रारम्भिक अनुसन्धानपछि कागजपत्र नियन्त्रणमा लिइएको र थप छानबिन अघि बढाइएको बुझिएको छ। घटनापछि बुधबार बसेको गाउँपालिका कार्यपालिकाको बैठकले अवैध रूपमा भण्डारण गरिएको नदीजन्य पदार्थ जफत गर्ने तथा ठेकेदारमाथि कारबाही गर्ने निर्णय गरेको छ। साथै उत्खनन्मा प्रयोग गरिएका दुई वटा मेसिन पनि नियन्त्रणमा लिइएको जनाइएको छ।
स्थानीय तहले यसअघि नै नदीजन्य पदार्थ उत्खनन् असारदेखि भदौसम्म पूर्ण रूपमा बन्द हुने सूचना जारी गरेको भए पनि अनुमति विपरीत गतिविधि भएको विषयले मिलेमतोको आशंका थप बलियो बनाएको स्थानीय सरोकारवालाहरूको भनाइ छ।
