काठमाडौँ । जुम्लास्थित राष्ट्रिय कृषि आधुनिकीकरण कार्यक्रम कार्यान्वयन एकाइले यहाँका २६ जना किसानलाई अनुदानमा हाते ट्याक्टर (मिनी टिलर) वितरण गरेको छ। कृषि समूह, किसान तथा कृषि उद्यमीहरूलाई लक्षित गर्दै कुल २६ वटा हाते ट्याक्टर वितरण गरिएको हो।
राष्ट्रिय कृषि आधुनिकीकरण कार्यक्रम कार्यान्वयन कार्यालय जुम्लाका कृषि अधिकृत कमल देवकोटाका अनुसार कृषि क्षेत्रमा आधुनिकीकरण प्रवर्द्धन गर्ने उद्देश्यसहित कृषि यान्त्रीकरण अन्तर्गत मिनी टिलर वितरण गरिएको हो। चालु आर्थिक वर्ष २०८२/८३ मा ५० प्रतिशत अनुदानमा २६ जना कृषि उद्यमी किसानलाई हाते ट्याक्टर उपलब्ध गराइएको उनले जानकारी दिए।
व्यावसायिक कृषि गर्दै आएका तथा आगामी दिनमा व्यावसायिक खेतीतर्फ उन्मुख हुन इच्छुक किसानहरूलाई प्राथमिकतामा राखी छनोट गरी मिनी टिलर वितरण गरिएको हो। यस कार्यक्रमले खेतीपातीलाई आधुनिकीकरण गर्दै उत्पादन वृद्धि गर्न सहयोग पुग्ने अपेक्षा गरिएको कार्यालय प्रमुख खेमराज शाहीले बताए।
कृषि यान्त्रीकरणसम्बन्धी कार्यक्रमहरू सञ्चालन भएपछि किसानहरूमा आधुनिक कृषि उपकरण प्रयोग गर्ने प्रवृत्ति बढ्दै गएको राष्ट्रिय कृषि आधुनिकीकरण कार्यक्रम कार्यान्वयन एकाइ जुम्लाले जनाएको छ।
