काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले पार्टीका केही नेताहरूले संगठनले अघि सारेका एजेण्डाहरू कमजोर पार्ने प्रयास गरेको आरोप लगाएका छन्।

काठमाडौंमा शुक्रबार सुरु भएको केन्द्रीय समिति बैठकलाई सम्बोधन गर्दै अध्यक्ष लिङ्देनले कठिन परिस्थितिमा पनि पार्टी राजसंस्था र हिन्दू राष्ट्रका एजेण्डाप्रति प्रतिबद्ध रहेको उल्लेख गरे। तर, आन्तरिक रूपमा केही गतिविधिले ती एजेण्डा कमजोर पार्ने प्रयास भएको उनको दाबी थियो।

उनले पार्टी सिद्धान्तबाट विचलित नहुने स्पष्ट पार्दै पुराना अभ्यास र शैली दोहोरिँदा संगठनमा अस्थिरता देखिन सक्ने टिप्पणी गरे। व्यक्तिगत विवाद र आन्तरिक प्रतिस्पर्धाले पार्टीलाई कमजोर बनाएको उनको भनाइ थियो।

बैठकमा आगामी मंसिरमा महाधिवेशन गर्ने प्रस्तावसमेत प्रस्तुत गरिएको छ। साथै, निर्वाचन तथा संगठनात्मक संरचनासम्बन्धी विभिन्न प्रतिवेदनहरू बैठकमा पेश गरिएको पार्टीले जनाएको छ।

Read More

काठमाडौं । सदर चिडियाखाना अनिश्चितकालका लागि बन्द गरिएको छ। चिडियाखाना परिसरमा रहेका केही जीवजन्तुमा बर्ड फ्लु संक्रमण देखिएपछि सर्वसाधारणको स्वास्थ्य सुरक्षालाई ध्यानमा राख्दै सेवा बन्द गरिएको हो।

कार्यालयका अनुसार संक्रमण नियन्त्रण र आवश्यक स्वास्थ्य सुरक्षा उपाय पूरा नभएसम्म चिडियाखाना बन्द रहनेछ। अर्को सूचना जारी भएपछि मात्र पुनः सञ्चालनबारे निर्णय गरिने बताइएको छ।

सार्वजनिक स्वास्थ्य जोखिमलाई मध्यनजर गर्दै तत्कालका लागि दर्शक प्रवेश पूर्ण रूपमा रोकिएको छ।

Read More

काठमाडौं । प्रतिनिधिसभाले विभिन्न चार अध्यादेशलाई बहुमतका आधारमा स्वीकृति दिएको छ। शुक्रबार बसेको बैठकले सार्वजनिक खरिद, सम्पत्ति शुद्धीकरण (मनी लाउन्डरिङ), सहकारी तथा स्वास्थ्य विज्ञान प्रतिष्ठानसम्बन्धी कानुन संशोधनका अध्यादेश पारित गरेको हो।

बैठकमा विपक्षी सांसदहरूले ती अध्यादेशहरू अस्वीकार गर्न छुट्टाछुट्टै प्रस्ताव दर्ता गरेका थिए। तर, सबै प्रस्ताव बहुमतले अस्वीकृत भएपछि अध्यादेशहरूले प्रतिनिधिसभाको स्वीकृति प्राप्त गरेका छन्।

स्वीकृत भएका अध्यादेशमा सार्वजनिक खरिद (दोस्रो संशोधन), सम्पत्ति शुद्धीकरण निवारण (तेस्रो संशोधन), सहकारी (पहिलो संशोधन) तथा स्वास्थ्य विज्ञान प्रतिष्ठानसम्बन्धी केही नेपाल ऐन संशोधनसम्बन्धी अध्यादेश समावेश छन्।

प्रतिनिधिसभाको अर्को बैठक असार ११ गतेका लागि तय गरिएको छ।

Read More

काठमाडौं । त्रिभुवन राजपथअन्तर्गत वीरगन्जको मुख्य सडक क्षेत्रमा सडक सीमाभित्र रहेका बाँकी घर तथा संरचनाहरू हटाउन आगामी आइतबारदेखि पुनः डोजर अभियान सञ्चालन गरिने भएको छ।

सडक विभागले यसअघि पहिलो चरणमा सडकको दायाँ–बायाँ २५–२५ मिटर क्षेत्रभित्र पर्ने संरचनाहरू हटाउने कार्य सुरु गरेको थियो। त्यसक्रममा आंशिक रूपमा भत्काइएका तथा अझै खाली नगरिएका संरचनाहरू अब विभागले हटाउने तयारी गरेको हो।

सडक डिभिजन हेटौँडाले वीरगन्ज महानगरपालिकासँग आवश्यक समन्वय र सहयोगका लागि अनुरोध गरेको छ। विभागका अनुसार मितेरी पुलदेखि गण्डक चोकसम्मको सडक खण्डमा सडक सीमाभित्र रहेका अवरोध हटाएर सडक विस्तार तथा व्यवस्थापन कार्यलाई अघि बढाइनेछ।

यसअघि जारी सूचनामार्फत सम्बन्धित घरधनीहरूलाई आफ्ना संरचना आफैँ हटाउन समय दिइएको थियो। तर निर्धारित अवधिमा अधिकांश संरचना खाली नभएपछि विभागले कानुनी प्रक्रियाअनुसार हटाउने निर्णय गरेको जनाएको छ।

विशेषगरी घण्टाघर, माइस्थान, आदर्शनगर र अलखियामठ चोक आसपासका क्षेत्रमा अझै धेरै संरचना सडक सीमाभित्र रहेको जनाइएको छ।

Read More

काठमाडौं । साताको अन्तिम कारोबार दिन शुक्रबार नेपाल स्टक एक्सचेन्ज (नेप्से) परिसूचक सामान्य वृद्धि सहित बन्द भएको छ। नेप्से १.६३ अंकले बढेर २७०२.११ विन्दुमा पुगेको हो।

बजारमा सुधार देखिएसँगै कारोबार रकम पनि अघिल्लो दिनको तुलनामा बढेको छ। यस दिन ३५३ वटा कम्पनीको १ करोडभन्दा बढी कित्ता सेयर खरिदबिक्री हुँदा कुल कारोबार रकम ४ अर्ब ५३ करोड रुपैयाँभन्दा बढी पुगेको छ।

कारोबार भएका कम्पनीमध्ये ११६ को सेयर मूल्य बढेको, १४० को घटेको तथा १७ कम्पनीको मूल्य स्थिर रहेको छ। अपोलो हाइड्रोपावरका लगानीकर्ताले सर्वाधिक लाभ कमाउँदा बुंगल हाइड्रोपावरको सेयर मूल्य सबैभन्दा धेरै घटेको छ।

कारोबार रकमका आधारमा ग्लोबल आइएमई बैंक डिबेन्चर २०८६/९७ अग्रस्थानमा रह्यो, जसको करिब ३३ करोड रुपैयाँ बराबरको कारोबार भएको छ।

क्षेत्रगत रूपमा फाइनान्स, हाइड्रोपावर, लगानी, जीवन बीमा, उत्पादन तथा प्रशोधन, माइक्रोफाइनान्स र ट्रेडिङ समूहमा हरियाली देखिएको छ भने अन्य अधिकांश उपसूचक दबाबमा रहेका छन्।

Read More

काठमाडौं ।  झापाको कनकाई नगरपालिका–५ तुलसीबारीमा ट्याक्टर र मोटरसाइकल एकआपसमा ठोक्किँदा बाबु–छोरीको मृत्यु भएको छ भने एक महिला गम्भीर घाइते भएकी छन्।

शुक्रबार दिउँसो भएको दुर्घटनामा मोटरसाइकल चालक झापा गाउँपालिका–३ का २० वर्षीय समिर अली र उनकी ५ वर्षीया छोरी हाजिरा खातुनको मृत्यु भएको प्रहरीले जनाएको छ।

दुर्घटनामा घाइते भएका उनीहरूलाई तत्काल उपचारका लागि कनकाई अस्पताल लगिएको थियो। अस्पतालले बाबु–छोरीलाई मृत घोषणा गरेको हो।

मोटरसाइकलमा सवार ४५ वर्षीया नुरेशसादेवी गम्भीर घाइते भएकी छन्। उनको बिर्तामोडस्थित बीएण्डसी अस्पतालमा उपचार भइरहेको छ।

प्रहरीका अनुसार खेतबाट सडकमा निस्कँदै गरेको ट्याक्टर र सुरुङ्गाबाट झापा बजारतर्फ जाँदै गरेको मोटरसाइकल ठोक्किएका थिए। घटनामा संलग्न ट्याक्टर चालकलाई नियन्त्रणमा लिएर थप अनुसन्धान भइरहेको छ।

Read More

काठमाडौँ । अर्थमन्त्री डा. स्वर्णिम वाग्लेले सरकारले गरिब तथा सीमान्तकृत समुदायलाई लक्षित सामाजिक सुरक्षा र कल्याणकारी कार्यक्रमहरूको बजेटमा कुनै कटौती नगरेको बताएका छन्।

शुक्रबार प्रतिनिधि सभामा बोल्दै उनले अघिल्ला सरकारले सञ्चालन गरेका यस्ता कार्यक्रमहरूलाई निरन्तरता दिइएको र आवश्यक स्थानमा थप सुदृढ बनाउने प्रयास गरिएको बताए।

विपक्षी सांसदहरूको आलोचनाप्रति प्रतिक्रिया दिँदै मन्त्री वाग्लेले सरकारले कुनै पनि लोककल्याणकारी कार्यक्रम बन्द वा कमजोर नपारेको दाबी गरे। बरु, ती कार्यक्रमलाई अझ प्रभावकारी र परिणाममुखी बनाउने दिशामा काम भइरहेको उनको भनाइ थियो।

उनले सरकारले सामाजिक सुरक्षासम्बन्धी प्रतिबद्धतालाई कायम राख्दै लक्षित वर्गको हितलाई प्राथमिकतामा राखेको समेत उल्लेख गरे।

Read More

काठमाडौं । राष्ट्रिय परीक्षा बोर्डले कक्षा १२ को ग्रेडवृद्धि (पूरक) परीक्षा आगामी साउन २ र ३ गते सञ्चालन गर्ने जनाएको छ।

बोर्डका अनुसार नियमित परीक्षामा सहभागी भई अधिकांश विषयमा ‘डी’ वा सोभन्दा माथिल्लो ग्रेड प्राप्त गरेका तर बढीमा दुई विषयमा नन-ग्रेडेड भएका वा दुई विषयसम्म अनुपस्थित रहेका विद्यार्थीहरू पूरक परीक्षामा सहभागी हुन सक्नेछन्।

परीक्षा दुवै दिन बिहान ११ बजेदेखि दिउँसो २ बजेसम्म सञ्चालन हुनेछ। बोर्डले सम्बन्धित विद्यार्थीहरूलाई समयमै आवश्यक तयारी गर्न आग्रह गरेको छ।

Read More

काठमाडौँ । प्रधानमन्त्री बालेन शाहको सचिवालयमा नेपालका लागि जर्मनीका राजदूत उडो युजेन भोल्जसँग असहज व्यवहार भएको दाबी सार्वजनिक भएपछि कूटनीतिक वृत्तमा यसको चर्चा सुरु भएको छ।

स्रोतहरूका अनुसार, विद्युतीय राहदानी (ई–पासपोर्ट) सम्बन्धी विषयमा छलफलका क्रममा प्रधानमन्त्री कार्यालयमा राजदूत भोल्ज र केही सहयोगीबीच तनावपूर्ण संवाद भएको बताइएको छ। घटनाप्रति असन्तुष्टि जनाउँदै जर्मन पक्षले यसबारे आफ्नो सरकारलाई जानकारी गराएको दाबी गरिएको छ।

परराष्ट्र मामिलाका जानकारहरूले कूटनीतिक प्रतिनिधिहरूसँगको व्यवहारमा अन्तर्राष्ट्रिय मर्यादा कायम राख्नुपर्नेमा जोड दिएका छन्। उनीहरूका अनुसार, यस्ता विवादले नेपालका विकास साझेदार राष्ट्रहरूसँगको सम्बन्धमा अनावश्यक असर पार्न सक्छ।

विज्ञहरूले घटनाको सत्यतथ्य छानबिन गरी आवश्यक कदम चाल्न सरकारलाई सुझाव दिएका छन्। साथै, विषयलाई संवाद र कूटनीतिक माध्यमबाट शीघ्र समाधान गर्नुपर्ने आवश्यकता औँल्याएका छन्।

हालसम्म यस विषयमा प्रधानमन्त्री कार्यालय वा जर्मन पक्षबाट विस्तृत आधिकारिक प्रतिक्रिया सार्वजनिक भएको छैन।

Read More

काठमाडौं । भारतको प्रतिष्ठित एपोलो अस्पतालले क्यान्सर सर्जरी तथा स्नायु (न्युरो) उपचारका क्षेत्रमा विकसित भएका नवीनतम चिकित्सा प्रविधिबारे जानकारी दिएको छ।

काठमाडौंमा आयोजित पत्रकार सम्मेलनमा ग्यास्ट्रोइन्टेस्टाइनल तथा हेपाटोप्यान्क्रियाटोबिलियरी (एचपीबी) सर्जिकल अंकोलोजीका प्रमुख कन्सल्टेन्ट डा. निखिल अग्रवाल, न्युरोसर्जरीका वरिष्ठ कन्सल्टेन्ट डा. शशांक शरद काले तथा न्युरोसर्जरी र न्युरोइन्टरभेन्सनका कन्सल्टेन्ट डा. अंकित जैनले आधुनिक उपचार विधिबारे विस्तृत छलफल गरेका थिए।

कार्यक्रममा डा. कालेले ब्रेन ट्युमरको उपचारमा प्रारम्भिक पहिचान अत्यन्त महत्वपूर्ण हुने उल्लेख गर्दै लगातार टाउको दुख्ने, कारणबिनै बान्ता हुने, दृष्टि धमिलो वा दोहोरो हुने, छारे रोगजस्तो कम्पन आउने तथा हातखुट्टा कमजोर हुने जस्ता लक्षण देखिए तुरुन्त विशेषज्ञको परामर्श लिन सुझाव दिए।

उनका अनुसार न्युरोनेभिगेसन, सर्जिकल माइक्रोस्कोप, क्युसा प्रणाली तथा मिनिमली इन्भेसिभ इन्डोस्कोपिक प्रविधिले स्वस्थ मस्तिष्कका तन्तुमा न्यून क्षति पुर्‍याउँदै ट्युमर हटाउन सहयोग गरिरहेका छन्।

त्यसैगरी, स्टेरियोट्याक्टिक रेडियोसर्जरी (ज्याप–एक्स) जस्ता प्रविधिले निश्चित प्रकारका ब्रेन ट्युमरको उपचार शल्यक्रिया बिना नै सम्भव बनाउँदै गएको पनि उनले बताए।

Read More