काठमाडौँ । अर्थमन्त्री डा. स्वर्णिम वाग्लेले नेपालका लागि वैदेशिक ऋण लिनु बाध्यात्मक आवश्यकता भएको बताएका छन्।
शुक्रबार प्रतिनिधिसभामा ‘राष्ट्र ऋण उठाउने विधेयक, २०८३’ सम्बन्धी छलफलमा उठाइएका प्रश्नहरूको जवाफ दिँदै उनले ऋणप्रति नकारात्मक धारणा आवश्यक नभएको टिप्पणी गरे।
अर्थमन्त्री वाग्लेले नेपालले ऋणलाई उत्पादनमूलक क्षेत्रमा उपयोग गर्दै तिर्ने क्षमता विस्तार गरिरहेको उल्लेख गरे। उनका अनुसार ऋण लिनु आफैंमा समस्या होइन, तर यसको सही उपयोग महत्वपूर्ण पक्ष हो।
उनले ऋणबारे अतिरञ्जित टिप्पणी गर्नु उचित नहुने बताउँदै देशको वर्तमान आर्थिक परिस्थितिमा वैदेशिक ऋण आवश्यक रहेको स्पष्ट पारे।
