काठमाडौं । एशियाली विकास बैंक (एडीबी)ले नेपालका नगरपालिकाहरूमा खानेपानी तथा सरसफाइ सेवाको पहुँच विस्तार गर्न ठूलो मात्रामा सहुलियत ऋण स्वीकृत गरेको छ।
बैंकका अनुसार करिब ११ करोड ५० लाख अमेरिकी डलर (१५ अर्ब रुपैयाँभन्दा बढी) बराबरको उक्त ऋण एकीकृत खानेपानी आपूर्ति तथा ढल व्यवस्थापन परियोजनाका लागि उपयोग गरिनेछ। परियोजना १३ जिल्लामा कार्यान्वयन हुने र करिब ८ लाख ५० हजारभन्दा बढी नागरिक प्रत्यक्ष लाभान्वित हुने अपेक्षा गरिएको छ।
परियोजनाअन्तर्गत शहरी क्षेत्रमा सुरक्षित खानेपानी आपूर्ति विस्तार गर्नुका साथै ढल तथा फोहोरपानी व्यवस्थापन प्रणाली सुधार गर्ने योजना रहेको छ। नगरपालिकाहरूमा खानेपानी वितरण संरचना विस्तार, सरसफाइ सेवा सुदृढीकरण र ढल पूर्वाधार निर्माणलाई प्राथमिकता दिइनेछ।
एडीबीका नेपालस्थित कन्ट्री डाइरेक्टर आर्नो कोश्वाका अनुसार तीव्र शहरीकरणसँगै बढ्दो जनसंख्याले खानेपानी र सरसफाइ सेवामा दबाब सिर्जना गरेको अवस्थामा यो परियोजना महत्वपूर्ण हुने अपेक्षा गरिएको छ।
परियोजना कार्यान्वयनपछि सार्वजनिक स्वास्थ्य सुधार, वातावरणीय प्रदूषण न्यूनीकरण तथा दिगो शहरी विकासमा उल्लेखनीय योगदान पुग्ने विश्वास लिइएको छ।
