काठमाडौं । संघीय संसद्को चालू अधिवेशन सुरु हुनुअघि ल्याइएका आठ अध्यादेश आज प्रतिनिधिसभामा छलफलका लागि अघि बढाइने भएको छ। ती अध्यादेशहरू अधिवेशन सुरु भएको दिन गत वैशाख २८ गते प्रतिनिधिसभा र राष्ट्रिय सभामा पेश गरिएको थियो।
तीमध्ये चार वटा अध्यादेश आजको बैठकमा स्वीकृतिका लागि प्रस्तावका रूपमा प्रस्तुत हुने कार्यसूची रहेको छ।
संसद् अधिवेशन नरहेका समयमा सरकारले विभिन्न कानुनी तथा नीतिगत विषयसँग सम्बन्धित अध्यादेशहरू जारी गरेको थियो। तीमध्ये संवैधानिक परिषद् (काम, कर्तव्य, अधिकार र कार्यविधि) (पहिलो संशोधन) अध्यादेश, सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, सार्वजनिक खरिद (दोस्रो संशोधन) अध्यादेश तथा विश्वविद्यालयसँग सम्बन्धित केही नेपाल ऐन संशोधन अध्यादेश प्रमुख रहेका छन्।
त्यसैगरी, स्वास्थ्य तथा जनसंख्या मन्त्रालयअन्तर्गत स्वास्थ्य विज्ञान प्रतिष्ठानसम्बन्धी केही नेपाल ऐन संशोधन अध्यादेश, सम्पत्ति शुद्धीकरण (मनि लाउन्डरिङ) निवारण (तेस्रो संशोधन) अध्यादेश, सहकारी (पहिलो संशोधन) अध्यादेश तथा केही नेपाल ऐन संशोधनसम्बन्धी अध्यादेश पनि सोही अवधिमा जारी भएका थिए।
आजको बैठकमा प्रधानमन्त्रीको तर्फबाट कानुन, न्याय तथा संसदीय मामिला मन्त्री सोविता गौतमले सार्वजनिक खरिद (दोस्रो संशोधन) अध्यादेश स्वीकृत गरियोस् भन्ने प्रस्ताव प्रस्तुत गर्ने कार्यक्रम रहेको छ।
त्यसैगरी अर्थ मन्त्री डा. स्वर्णिम वाग्लेले सम्पत्ति शुद्धीकरण (मनि लाउन्डरिङ) निवारण (तेस्रो संशोधन) अध्यादेश स्वीकृत गरियोस् भन्ने प्रस्ताव पेस गर्ने कार्यसूची छ।
भूमि व्यवस्था, सहकारी तथा सङ्घीय मामिला तथा सामान्य प्रशासन मन्त्री प्रतिभा रावलले सहकारी (पहिलो संशोधन) अध्यादेश स्वीकृत गरियोस् भन्ने प्रस्ताव प्रस्तुत गर्नेछिन्।
त्यस्तै स्वास्थ्य तथा खाद्य स्वच्छता मन्त्री निशा मेहताले स्वास्थ्य विज्ञान प्रतिष्ठानसम्बन्धी केही नेपाल ऐन संशोधन अध्यादेश स्वीकृत गरियोस् भन्ने प्रस्ताव प्रस्तुत गर्ने कार्यक्रम रहेको छ।
