काठमाडौं । संस्कृति, पर्यटन तथा नागरिक उड्डयनमन्त्री खड्कराज पौडेलले गौतमबुद्ध अन्तर्राष्ट्रिय विमानस्थललाई पूर्ण रूपमा सञ्चालनमा ल्याउने तयारी भइरहेको बताएका छन्।
रुपन्देहीको भैरहवामा शुक्रबार आयोजित एक कार्यक्रममा उनले विमानस्थल सञ्चालनका लागि सरकारले आवश्यक नीतिगत तथा प्राविधिक गृहकार्य अघि बढाइरहेको जानकारी दिए। विमानस्थल नचल्नुको कारण राजनीतिक वा कूटनीतिक नभई केही नीतिगत त्रुटिहरू भएको र ती सुधार गर्ने काम भइरहेको उनको भनाइ छ।
मन्त्री पौडेलले श्रमिकहरूका लागि श्रम स्वीकृति लिन अब घरमै बसेर अनलाइन माध्यमबाट सम्भव हुने व्यवस्था लागू गरिएको उल्लेख गर्दै यसका लागि काठमाडौं आउनुपर्ने बाध्यता हटाइएको बताए।
उनले केवल श्रमिक ओसारपसारमा सीमित नभई पर्यटक आकर्षण बढाउनेतर्फ पनि ध्यान दिनुपर्ने आवश्यकता औंल्याए। पर्यटन प्रवर्द्धनका कार्यक्रममार्फत अन्तर्राष्ट्रिय यात्रु बढाउन सकिने उनको धारणा थियो।
साथै, दीर्घकालीन पूर्वाधार विकासका लागि निजगढ अन्तर्राष्ट्रिय विमानस्थल निर्माण पनि आवश्यक रहेको उनले बताए।
