काठमाडौं । मध्यपूर्वमा भू–राजनीतिक तनाव कायम रहे पनि अन्तर्राष्ट्रिय बजारमा सोमबार कच्चा तेलको मूल्यमा गिरावट आएको छ।
बजारमा आपूर्ति बढ्ने अपेक्षा र लगानीकर्ताको सतर्क व्यवहारका कारण ब्रेन्ट र डब्लूटीआई दुवै प्रकारका कच्चा तेलको मूल्य घटेको हो।
कारोबारका क्रममा ब्रेन्ट क्रुडको मूल्य १.६४ प्रतिशतले घटेर प्रतिब्यारेल ७९.२५ अमेरिकी डलरमा झरेको छ। सुरुआती कारोबारमा भने यसको मूल्य ८२.३० डलरसम्म पुगेको थियो।
त्यसैगरी, वेस्ट टेक्सास इन्टरमिडियट (डब्लूटीआई) क्रुडको मूल्य ०.४४ प्रतिशतले घट्दै प्रतिब्यारेल ७५.५२ डलरमा सीमित भएको छ।
यसैबीच, इरानले हर्मुज जलमार्ग पुनः बन्द गर्ने घोषणा गरेपछि विश्व ऊर्जा आपूर्तिमा चिन्ता बढेको छ। विश्वको करिब २० प्रतिशत तेल आपूर्ति हुने उक्त मार्गमा अवरोध आउँदा आपूर्ति शृंखलामा दबाब पर्ने आशंका गरिएको छ।
अमेरिका–इरानबीचको अस्थायी शान्ति प्रयासअन्तर्गत भएको पछिल्लो वार्ता अपेक्षाअनुसार अघि नबढेको बताइएको छ। अमेरिकी उपराष्ट्रपति जेडी भान्स र इरानी अधिकारीबीच छलफल भए पनि तनाव कायम रहेको अन्तर्राष्ट्रिय सञ्चारमाध्यमले जनाएका छन्। अमेरिकी राष्ट्रपति डोनाल्ड ट्रम्पले आवश्यक परे सैन्य कारबाही पुनः गर्न सकिने चेतावनी दिएका छन्।
यद्यपि प्रमुख उत्पादक राष्ट्रहरूले उत्पादन वृद्धि गर्ने संकेत दिएपछि बजारमा आपूर्ति सहज हुने अपेक्षा बढेको छ। इराकसहित केही देशको उत्पादन विस्तार योजनाले समेत मूल्यमा दबाब पारेको विश्लेषण छ। पछिल्लो एक सातामा कच्चा तेलको मूल्य करिब ८ प्रतिशतले घटेको देखिएको छ।
