काठमाडौं । राष्ट्रिय स्वतन्त्र पार्टी (रास्वपा)ले वरिष्ठ नेता पदमा निर्वाचन नगर्ने भएको छ। नयाँ विधानमार्फत सिर्जना गरिएको उक्त पदलाई महाधिवेशनले अनुमोदन गर्ने व्यवस्था गरिएको छ।
पार्टीका अनुसार यो पद विशेष रूपमा बालेन शाहको समूह पार्टीमा समाहित भएपछि उनलाई केन्द्रमा राखेर व्यवस्था गरिएको हो। यसै कारण वरिष्ठ नेता पदमा निर्वाचन नगर्ने प्रावधान विधानमै समावेश गरिएको बताइएको छ।
चुनावअघि तयार पारिएको प्रारम्भिक विधानमा यो पद नरहेको भए पनि महाधिवेशनको पूर्वसन्ध्यामा संशोधन गर्दै थप गरिएको हो। पार्टी निर्वाचन आयोगका उपप्रमुख राम गुरुङका अनुसार वरिष्ठ नेताको पदमा निर्वाचन नहुने र बालेन शाहलाई नै निरन्तरता दिइनेछ।
उनका अनुसार वरिष्ठ नेता पदमा प्रतिस्पर्धा नहुने भएकाले सम्बन्धित व्यक्तिले केन्द्रीय सदस्यका लागि पनि निर्वाचनमा भाग लिनु नपर्ने व्यवस्था गरिएको छ।
