काठमाडौं। रूसको राजधानी मस्कोतर्फ लक्षित करिब ६० वटा ड्रोन खसालिएपछि सुरक्षा कारण देखाउँदै त्यहाँका चारवटै प्रमुख विमानस्थल सोमबार केही समयका लागि बन्द गरिएका छन्।
मस्कोका मेयर सर्गेई सोब्यानिनले टेलिग्राममार्फत ५९ वटा ड्रोन नष्ट गरिएको जानकारी दिएका छन्। उनका अनुसार ती ड्रोन मस्को नजिक पुग्नुअघि नै खसालिएका थिए।
रूसले युक्रेनका विभिन्न सहरमा आक्रमण जारी राखिरहेकै बेला युक्रेनले पनि प्रतिकारस्वरूप रूसी भूभागभित्र ड्रोन आक्रमण गर्दै आएको छ। यद्यपि मेयर सोब्यानिनले नष्ट गरिएका ड्रोन युक्रेनबाट प्रक्षेपण गरिएका हुन् वा होइनन् भन्ने स्पष्ट उल्लेख गरेका छैनन्।
सुरक्षा अवस्था कारण देखाउँदै रूसी उड्डयन निकायले मस्कोका चारवटै विमानस्थल अस्थायी रूपमा बन्द गरेको थियो। पछि स्थानीय समयअनुसार बिहान ५:३९ बजे विमानस्थल पुनः सञ्चालनमा ल्याइएको अधिकारीहरूले जनाएका छन्।
