काठमाडौं। महोत्तरीका दुई चिनी उद्योगमा बिक्री गरिएको उखुको रकममध्ये किसानले करिब १ अर्ब ७७ करोड रुपैयाँ भुक्तानी पाएका छन्। जिल्ला प्रशासन कार्यालय महोत्तरीका अनुसार एभरेष्ट सुगर एण्ड केमिकल इन्डष्ट्रिज र सिद्धिविनायक सुगर एण्ड केमिकल इन्डष्ट्रिजले खरिद गरेको उखुबापत किसानलाई १ अर्ब ७६ करोड ५२ लाख ४६ हजार रुपैयाँभन्दा बढी भुक्तानी गरिएको छ।
आर्थिक वर्ष २०८२/८३ को याममा किसानले दुवै उद्योगलाई २८ लाख ६७ हजार क्विन्टलभन्दा बढी उखु बिक्री गरेका थिए। कुल उखुको मूल्य १ अर्ब ७७ करोड ३४ लाख रुपैयाँ रहेकोमा अधिकांश रकम भुक्तानी भइसकेको प्रशासनले जनाएको छ।
यस्तै, सरकारले उपलब्ध गराउने उखु किसान अनुदानबापतको २० करोड ७ लाख रुपैयाँभन्दा बढी रकम भुक्तानीका लागि सिफारिस गरिएको छ। जिल्ला भुक्तानी समितिले अनुदान वितरण प्रक्रिया अघि बढाएको जनाएको छ।
प्रशासनका अनुसार उखुको बाँकी रकम र सरकारी अनुदान असार मसान्तभित्रै किसानलाई उपलब्ध गराउने तयारी गरिएको छ।
