काठमाडौँ । नेपाल धितोपत्र बोर्ड (सेबोन) को कार्यालयमा मंगलबार शेयर लगानीकर्ताहरूले प्रदर्शन गर्दै पूँजीबजार सुधारका लागि तत्काल नीतिगत हस्तक्षेप गर्न माग गरेका छन्।
शेयर लगानीकर्ता तिलक कोइरालाको नेतृत्वमा बोर्ड पुगेको टोलीले निरन्तर ओरालो लागेको बजारप्रति सरकार र नियामक निकाय गम्भीर बन्नुपर्ने माग गरेको हो। प्रदर्शनकारीहरूले बजारलाई स्थायित्व दिने नीति, लगानीकर्ताको विश्वास बढाउने व्यवस्था तथा पूँजीबजार सुधारका ठोस कार्यक्रम अघि सार्न आग्रह गरेका छन्।
हालै सेबोनको अध्यक्षको जिम्मेवारी सम्हालेका डा. गोपाल प्रसाद भट्टले पूँजीबजार सुधारका लागि विभिन्न नीतिगत सुधार अघि बढाउने प्रतिबद्धता व्यक्त गर्दै लगानीकर्ता संघ–संस्थाले पेश गरेको आठबुँदे सुझाव कार्यान्वयनमा लैजाने बताएका छन्।
नयाँ सरकार गठनपछि बजारमा सुधार आउने अपेक्षा गरिए पनि पछिल्ला दिनमा नेप्से परिसूचक लगातार दबाबमा रहेको भन्दै लगानीकर्ताहरूले चिन्ता व्यक्त गरेका छन्। बजारमा आएको गिरावटका कारण धेरै लगानीकर्ता घाटामा परेको उनीहरूको भनाइ छ।
प्रदर्शनकारीहरूले अर्थमन्त्री डा. स्वर्णिम वाग्लेको पछिल्लो अभिव्यक्ति तथा सरकारको नीतिले बजारमा सकारात्मक सन्देश दिन नसकेको आरोप पनि लगाएका छन्। यद्यपि, बजारको उतारचढावमा आर्थिक अवस्था, लगानीकर्ताको मनोविज्ञान, तरलता, ब्याजदर तथा नीतिगत व्यवस्थालगायत विभिन्न पक्षले प्रभाव पार्ने भएकाले यसको एउटै कारणलाई जिम्मेवार मान्न सकिँदैन।
लगानीकर्ताहरूले नियामक निकायले पूँजीबजारलाई थप पारदर्शी, व्यवस्थित र लगानीमैत्री बनाउन आवश्यक नीति, नियम तथा पूर्वाधार विकासमा प्रभावकारी भूमिका निर्वाह गर्नुपर्नेमा जोड दिएका छन्।
