काठमाडौं । सरकारले आर्थिक वर्ष २०८३/८४ मा निर्माण गरिने कानूनको मस्यौदा सूची र वार्षिक विधायन कार्यतालिका सङ्घीय संसद्मा पठाएको छ।
कानून, न्याय तथा संसदीय मामिला मन्त्री सोविता गौतमले बुधबार सभामुख डोलप्रसाद अर्याल र राष्ट्रिय सभा अध्यक्ष नारायण दाहाललाई भेटेर विधेयकको सूची र कार्यतालिका हस्तान्तरण गरेकी हुन्।
विधायन ऐन, २०८१ अनुसार आगामी आर्थिक वर्षमा संसद्मा पेस गरिने विधेयकको प्राथमिकता निर्धारण गरी कानून मन्त्रालयले असार मसान्तभित्र संसद्मा पठाउनुपर्ने व्यवस्था छ।
मन्त्रालयका अनुसार आगामी वर्ष संसद्मा १६६ वटा विधेयक पेस गर्ने तयारी गरिएको छ। तीमध्ये ९७ वटा नयाँ र ६९ वटा संशोधन विधेयक रहेका छन्।
विधेयकलाई प्राथमिकताका आधारमा वर्गीकरण गर्दा पहिलो प्राथमिकतामा ६४, दोस्रोमा ४५ र तेस्रोमा ५७ वटा विधेयक रहेका छन्।
मन्त्री गौतमले सुशासन, सहज सेवा प्रवाह र नीतिगत सुधारका लागि कानून निर्माणलाई सरकारले प्राथमिकतामा राखेको बताएकी छन्। उनले सबै मन्त्रालयसँग छलफल गरी विधेयकको प्राथमिकता निर्धारण गरेर संसद्मा पठाइएको जानकारी दिइन्।
