काठमाडौं । नेपाल धितोपत्र बोर्ड (सेबोन) का अध्यक्ष डा. गोपालप्रसाद भट्टले प्रि–आईपीओका नाममा हुने अवैध गतिविधि नियन्त्रण गर्न शून्य सहनशीलताको नीति अपनाइने बताएका छन्।
प्रतिनिधिसभाअन्तर्गतको अर्थ समिति बैठकमा बुधबार अध्यक्ष भट्टले विगतका विषयभन्दा आगामी दिनमा बोर्डभित्र वा बाहिर हुने कुनै पनि गलत गतिविधिमा कडाइ गरिने बताए।
उनले आईपीओलगायत धितोपत्रसम्बन्धी सबै प्रक्रियालाई पारदर्शी प्रणालीमार्फत अघि बढाइने प्रतिबद्धता व्यक्त गरे। आगामी वर्षदेखि निरीक्षण, सुपरीवेक्षण, मापदण्ड, रिपोर्टिङ प्रणाली, पूर्वाधार र सूचना प्रविधि प्रणालीमा कडा निगरानी गरिने उनको भनाइ थियो।
बैठकमा सांसदहरूले शेयर बजारमा हुने अस्वाभाविक चलखेल रोक्न तथा लगानीकर्ताको सुरक्षा सुनिश्चित गर्न बोर्डको भूमिका प्रभावकारी बनाउनुपर्ने धारणा राखेका थिए।
समिति सदस्यहरूले प्रि–आईपीओमा मूल्य निर्धारण प्रक्रिया, संकलित रकमको उपयोग, कम्पनीहरूको वित्तीय विवरण र संस्थागत सुशासनका विषयमा प्रश्न उठाएका थिए।
सांसदहरूले कम्पनीहरूले आईपीओअघि राम्रो वित्तीय अवस्था देखाउने तर पछि कमजोर प्रदर्शन गर्ने प्रवृत्तिमाथि निगरानी बढाउनुपर्ने तथा सर्वसाधारण लगानीकर्ताको हित संरक्षणमा बोर्ड थप सक्रिय हुनुपर्ने सुझाव दिएका थिए।
