काठमाडौँ । कुवेत र बहराइनले बुधबार इरानबाट भएका हवाई आक्रमणका प्रयासलाई आफ्नो प्रतिरक्षा प्रणालीमार्फत निष्क्रिय बनाएको बताएका छन् ।
इरान र अमेरिकाबीच होर्मुज जलसन्धिलाई लिएर सैन्य तनाव बढिरहेका बेला यी घटनाहरू भएका हुन् ।
कुवेती सेनाले इरानबाट आएका ड्रोनहरूलाई आफ्नो हवाई सुरक्षा प्रणालीले पहिचान गरी अवरोध गरेको जनाएको छ । सेनाले उक्त घटनालाई इरानको आक्रामक कदमको परिणाम भन्दै आलोचना गरेको छ ।
यस्तै, बहराइनको सेनाले पनि इरानतर्फबाट भएका विभिन्न हवाई आक्रमणका प्रयासलाई सफलतापूर्वक रोकिएको र नष्ट गरिएको दाबी गरेको छ ।
यसअघि बुधबार बिहान बहराइनको गृह मन्त्रालयले सम्भावित क्षेप्यास्त्र तथा हवाई आक्रमणको संकेत दिने चेतावनी साइरन बजाउँदै नागरिक तथा त्यहाँ रहेका व्यक्तिहरूलाई संयम अपनाउन र आवश्यक परे सुरक्षित स्थानमा जान आग्रह गरेको थियो ।
यसैबीच, इरानको सरकारी सञ्चारमाध्यमले अमेरिकी सेनाले इरानमाथि गरेको आक्रमणको जवाफस्वरूप कुवेतस्थित अमेरिकी सैन्य संरचना र बहराइनमा रहेको अमेरिकी पाँचौँ नौसैनिक बेडालाई लक्षित गरी छुट्टाछुट्टै कारबाही गरिएको दाबी गरेको छ ।
