काठमाडौं। साताको पहिलो कारोबार दिन सोमबार नेपाली सेयर बजारमा सकारात्मक माहोल देखिएको छ। नेप्से परिसूचक उल्लेख्य रूपमा बढ्दै २ हजार ७१९.२४ विन्दुमा पुगेर कारोबार बन्द भएको हो।
यस दिन नेप्से ४१.७० अंकले वृद्धि भएको छ। बजारमा ३४३ वटा कम्पनी तथा धितोपत्रका १ करोड २२ लाख ४५ हजार ३३७ कित्ता सेयर किनबेच भएका छन्। दिनभरको कारोबार रकम रु ५ अर्ब ५१ करोड २६ लाख ८८ हजार ९७९ पुगेको छ।
बजार उकालो लाग्दा केही कम्पनीका लगानीकर्ताले उल्लेख्य लाभ हासिल गरेका छन्। एभरेष्ट कलर लिमिटेडको सेयर मूल्य सबैभन्दा धेरै १४.९७ प्रतिशतले बढेको छ भने रिड्ज लाइन इनर्जीको सेयर मूल्य १४.६४ प्रतिशतले वृद्धि भएको छ।
त्यस्तै, श्रीनगर एग्रिटेक इन्डस्ट्रिजको सेयर मूल्य १० प्रतिशतले बढेको छ। सोलु हाइड्रोपावर र रिलायन्स स्पिनिङ मिल्सको सेयर मूल्य क्रमशः ९.५६ प्रतिशत र ९.३१ प्रतिशतले उकालो लागेको छ।
कारोबार रकमका आधारमा आँखु खोला जलविद्युत कम्पनी अग्रस्थानमा रह्यो। उक्त कम्पनीको करिब रु २९ करोड बराबरको सेयर कारोबार भएको छ। रिलायन्स स्पिनिङ मिल्सको रु २४ करोड, रिडी पावरको रु २० करोड, कर्पोरेट डेभलपमेन्ट बैंकको रु १९ करोड र नेसनल हाइड्रोपावरको रु १५ करोड बराबरको कारोबार भएको छ।
सोमबार कारोबार भएका कम्पनीमध्ये २३९ वटा स्टकको मूल्य बढेको छ भने ३२ वटाको मूल्य घटेको छ। पाँच वटा कम्पनीको सेयर मूल्यमा कुनै परिवर्तन देखिएन।
बजारका अधिकांश समूहगत उपसूचक सकारात्मक रहे पनि म्युचुअल फन्ड समूह भने सामान्य गिरावटमा रह्यो। म्युचुअल फन्ड उपसूचक ०.०२ प्रतिशतले घटेको छ।
