काठमाडौं । नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ ले पार्टी संगठन मजबुत बनाउने, आन्दोलनलाई प्रभावकारी बनाउने र पार्टी निर्माणको कामलाई प्राथमिकतामा राखेको बताएका छन्।
बुधबार जनकपुरमा आयोजित नेकपा मधेश प्रदेश एकता बैठक तथा प्रशिक्षण कार्यक्रममा बोल्दै प्रचण्डले मधेशमा बलियो संगठन निर्माण गर्न सके त्यसले देशभरको कम्युनिस्ट आन्दोलनलाई सकारात्मक प्रभाव पार्ने बताए।
उनले मधेशमा पार्टी कमजोर भए त्यसको असर समग्र राजनीतिक यात्रामा पर्न सक्ने भन्दै संगठन विस्तारलाई गम्भीरतापूर्वक लिनुपर्ने धारणा राखे।
प्रचण्डले पार्टीभित्र जिम्मेवारी बाँडफाँड र कार्यविभाजनमा केही असन्तुलन देखिएको स्वीकार गर्दै नेता तथा कार्यकर्ताबाट आएका गुनासा र असन्तुष्टिलाई सम्बोधन गर्न कार्यविभाजन पुनरावलोकन गरिने प्रतिबद्धता व्यक्त गरे।
