काठमाडौं । सङ्घीय संसद् मातहतका तीनवटा विषयगत समितिको बैठक आज बस्दैछ। सङ्घीय संसद् सचिवालयका अनुसार विकास, आर्थिक मामिला तथा सुशासन समिति, विधायन व्यवस्थापन समिति तथा सङ्घीयता सबलीकरण तथा राष्ट्रिय सरोकार समितिले आ–आफ्ना कार्यसूचीमा छलफल गर्नेछन्।
विकास, आर्थिक मामिला तथा सुशासन समितिको बैठक बिहान ११ः०० बजे बस्नेछ। बैठकमा आर्थिक वर्ष २०८३/८४ को वार्षिक कार्ययोजना तयारी सम्बन्धी विषयमा छलफल हुने कार्यसूची रहेको छ।
त्यसैगरी, विधायन व्यवस्थापन समितिको बैठक पनि बिहान ११ः०० बजे बस्नेछ। उक्त बैठकमा अभिमुखीकरण कार्यक्रम सञ्चालन सम्बन्धी विषयमा छलफल गरिने सचिवालयले जनाएको छ।
यस्तै, सङ्घीयता सबलीकरण तथा राष्ट्रिय सरोकार समितिको बैठक अपराह्न २ः३० बजे बस्नेछ। बैठकमा दक्षिणी सीमा क्षेत्रमा बसोबास गर्ने नागरिकको शान्ति सुरक्षा तथा त्यससँग सम्बन्धित विषयमा छलफल हुने कार्यसूची रहेको छ।
