काठमाडौं। देशभर मनसुनी वायुको प्रभाव कायम रहँदा अधिकांश भूभागमा बदलीसँगै वर्षा भइरहेको छ। मनसुनको न्यून चापीय रेखा सरदर स्थानकै आसपास रहेकाले आज पनि देशका अधिकांश क्षेत्रमा वर्षाको सम्भावना रहेको जल तथा मौसम विज्ञान विभागको मौसम पूर्वानुमान महाशाखाले जनाएको छ।
महाशाखाका अनुसार आज देशभर साधारणतया बदली रहनेछ। हिमाली, पहाडी तथा तराईका विभिन्न भूभागमा हल्कादेखि भारी वर्षासम्मको सम्भावना रहेकाले मौसमअनुसार आवश्यक सतर्कता अपनाउन आग्रह गरिएको छ।
कोशी प्रदेश
कोशी प्रदेशका सबै भूभागमा हाल साधारणतया बदली रहेको छ भने केही स्थानमा हल्कादेखि मध्यम वर्षा भइरहेको छ। दिउँसो प्रदेशका अधिकांश क्षेत्रमा बदली रहने अनुमान गरिएको छ। हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ। तराईका केही स्थानमा पनि मेघगर्जन र चट्याङसहित मध्यम वर्षा हुनसक्नेछ।
रातिको समयमा हिमाली तथा पहाडी क्षेत्रमा भारी वर्षाको सम्भावना रहेको छ। साथै, एक–दुई स्थानमा धेरै भारी वर्षा हुनसक्ने महाशाखाले जनाएको छ।
मधेस प्रदेश
मधेस प्रदेशका अधिकांश भूभागमा हाल आंशिक बदली रहेको छ। दिउँसो तराईका केही स्थानमा मेघगर्जन र चट्याङसहित मध्यम वर्षाको सम्भावना रहेको छ। राति पनि तराईका केही स्थानमा मध्यम वर्षा हुनसक्ने अनुमान गरिएको छ।
वर्षाका कारण दैनिक जनजीवन प्रभावित हुनसक्ने भएकाले आवश्यक सावधानी अपनाउन महाशाखाले आग्रह गरेको छ।
बागमती प्रदेश
बागमती प्रदेशका हिमाली तथा पहाडी भूभागमा हाल साधारणतया बदली रहेको छ भने केही स्थानमा हल्कादेखि मध्यम वर्षा भइरहेको छ। दिउँसो हिमाली तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।
राति प्रदेशका हिमाली तथा पहाडी भूभागमा भारी वर्षा हुनसक्नेछ। केही स्थानमा भने धेरै भारी वर्षासमेत हुनसक्ने महाशाखाले जनाएको छ। तराई क्षेत्रमा पनि मेघगर्जन र चट्याङसहित मध्यम वर्षाको सम्भावना रहेको छ।
गण्डकी प्रदेश
गण्डकी प्रदेशका हिमाली तथा पहाडी क्षेत्रमा हाल साधारणतया बदली रहेको छ भने केही स्थानमा हल्कादेखि मध्यम वर्षा भइरहेको छ। दिउँसो पहाडी क्षेत्रका धेरै स्थानमा मध्यम वर्षा हुनसक्ने अनुमान गरिएको छ।
हिमाली क्षेत्रमा मेघगर्जन र चट्याङसहित मध्यम वर्षा तथा हिमपातको सम्भावना छ। राति हिमाली तथा पहाडी भूभागमा भारी वर्षाको सम्भावना रहेको छ भने एक–दुई स्थानमा धेरै भारी वर्षा हुनसक्ने महाशाखाले जनाएको छ। तराई क्षेत्रमा पनि मध्यम वर्षाको सम्भावना रहेको छ।
लुम्बिनी प्रदेश
लुम्बिनी प्रदेशका सबै भूभागमा हाल साधारणतया बदली रहेको छ भने केही स्थानमा हल्कादेखि मध्यम वर्षा भइरहेको छ। दिउँसो तराई तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा हुनसक्नेछ।
पहाडी तथा तराई भूभागका केही स्थानमा भारी वर्षाको समेत सम्भावना रहेको छ। राति प्रदेशका धेरै स्थानमा मध्यम वर्षा तथा केही स्थानमा भारी वर्षा हुनसक्ने महाशाखाले जनाएको छ।
कर्णाली प्रदेश
कर्णाली प्रदेशका हिमाली तथा पहाडी भूभागमा हाल साधारणतया बदली रहेको छ भने केही स्थानमा हल्कादेखि मध्यम वर्षा भइरहेको छ। दिउँसो पहाडी क्षेत्रमा मध्यम वर्षाको सम्भावना रहेको छ।
राति पहाडी भूभागका केही स्थानमा भारी वर्षा हुनसक्ने अनुमान गरिएको छ। लगातारको वर्षाका कारण पहिरो तथा भूक्षयको जोखिम बढ्नसक्ने भएकाले आवश्यक सतर्कता अपनाउन महाशाखाले आग्रह गरेको छ।
सुदूरपश्चिम प्रदेश
सुदूरपश्चिम प्रदेशका हिमाली तथा पहाडी भूभागमा हाल साधारणतया बदली रहेको छ भने केही स्थानमा हल्कादेखि मध्यम वर्षा भइरहेको छ। तराई क्षेत्रमा भने आंशिक बदली रहेको छ।
दिउँसो पहाडी तथा तराईका केही स्थानमा मेघगर्जन र चट्याङसहित मध्यम वर्षा हुनसक्नेछ। राति प्रदेशका पहाडी तथा तराई क्षेत्रका धेरै स्थानमा मध्यम वर्षा र केही स्थानमा भारी वर्षाको सम्भावना रहेको छ। एक–दुई स्थानमा धेरै भारी वर्षासमेत हुनसक्ने महाशाखाले जनाएको छ।
महाशाखाका अनुसार भारी तथा धेरै भारी वर्षा हुने सम्भावित क्षेत्रमा गेग्रान बहाव, बाढी, पहिरो तथा भूक्षयको जोखिम बढ्नसक्छ। त्यसैले त्यस्ता क्षेत्रका स्थानीय बासिन्दालाई आवश्यक सतर्कता अपनाउन आग्रह गरिएको छ।
वर्षाका कारण दैनिक जनजीवनसँगै कृषि, स्वास्थ्य सेवा, पर्यटन, पर्वतारोहण तथा सडक र हवाई यातायातसमेत प्रभावित हुनसक्ने भएकाले मौसमको अवस्थाबारे नियमित जानकारी लिएर मात्र यात्रा तथा अन्य गतिविधि सञ्चालन गर्न महाशाखाले अनुरोध गरेको छ।
