काठमाडौं । झमझम पानी परिरहेको छ। सडकमा पानीको चिसो छ, तर भक्तजनको उत्साहमा कुनै कमी छैन। साउनको अन्तिम सोमबार भएकाले बिहानैदेखि पशुपतिनाथ मन्दिरमा शिवभक्तको बाक्लो उपस्थिति देखिएको छ। हातमा पूजा सामग्री बोकेर भक्तजन लामबद्ध हुँदै भगवान् पशुपतिनाथको दर्शनका लागि अघि बढिरहेका छन्।
बिहान ३ बजेदेखि नै पशुपतिनाथ मन्दिरका चारै ढोका खोलिएको पशुपति क्षेत्र विकास कोष सञ्चालक परिषद्का सदस्य केदारमान भण्डारीले जानकारी दिए। मन्दिर प्रवेशका लागि चारैतर्फबाट छुट्टाछुट्टै लामको व्यवस्था गरिएको छ।
झरीले छेकिएन भक्तजनको यात्रा
पशुपतिनाथ दर्शनका लागि गौशाला, जयवागीश्वरी, मित्र उद्यान, चाबहिल, मैजुबहाल, चुच्चेपाटी, कुमारीगाल, वाग्मती करिडोर, गुह्येश्वरी, मृगस्थली, गौरीनगर, पिङ्गलास्थानलगायत क्षेत्रबाट भक्तजन आउने क्रम बिहानैदेखि जारी छ।
गौरीनगरसम्मै भक्तजनको लाम देखिएको छ। यद्यपि लाममा बसेका भक्तजनले लामो समयसम्म प्रतीक्षा गर्नुपर्ने अवस्था नरहेको पशुपति क्षेत्र विकास कोषले जनाएको छ।
सुन्दरीजलबाट जल बोकेर पशुपतिनाथमा
साउनको अन्तिम सोमबारको अवसरमा सुन्दरीजलबाट जल ल्याएर पशुपतिनाथमा चढाउने भक्तजनको पनि उल्लेख्य भीड छ। बिहानैदेखि भक्तजन हातमा जल तथा पूजा सामग्री लिएर मन्दिरतर्फ पुगेका छन्।
पशुपतिनाथको दर्शनसँगै विशेष पूजा गर्न आउने श्रद्धालुका लागि सहज, सुरक्षित र व्यवस्थित व्यवस्थापन मिलाइएको कोषले जनाएको छ।
सुरक्षा र ट्राफिक व्यवस्थापनमा व्यापक तयारी
दर्शनार्थीको भीडलाई व्यवस्थित गर्न पशुपति क्षेत्र विकास कोषका पदाधिकारी तथा कर्मचारीसँगै मन्दिर पहरा गण, नेपाल प्रहरी, सशस्त्र प्रहरी बल, नेपाली सेना, ट्राफिक प्रहरी र काठमाडौं महानगर प्रहरी परिचालन गरिएको छ।
विभिन्न धार्मिक तथा सामाजिक सङ्घ–संस्थाले पनि व्यवस्थापनमा सहयोग गरिरहेका छन्। सवारी आवागमन सहज बनाउन गौशाला, जयवागीश्वरी, सिफल, मित्र उद्यान, चाबहिल र गौरीनगर क्षेत्रमा ट्राफिक प्रहरीको बाक्लो उपस्थिति छ।
राति ८ बजेसम्म खुला रहने पशुपतिनाथका ढोका
बिहान ३ बजेदेखि खोलिएका पशुपतिनाथ मन्दिरका चारै ढोका बेलुकी आरतीपछि राति ८ बजेसम्म खुला रहनेछन्। विशेष पूजा भने बिहान ८ः३० बजेदेखि मध्याह्न १२ बजेसम्म सञ्चालन हुने जनाइएको छ।
भक्तजनको चापलाई ध्यानमा राख्दै मन्दिर प्रवेशका लागि चारवटै दिशाबाट लामको व्यवस्था गरिएको छ। बिहानैदेखि भक्तजनको चाप बढे पनि लाममा लामो समयसम्म बस्नुपर्ने अवस्था नरहेको कोषले जनाएको छ।
स्वास्थ्य सेवासहित भक्तजनका लागि विशेष व्यवस्था
पशुपति क्षेत्रमा दर्शनार्थीको स्वास्थ्य सुरक्षालाई समेत प्राथमिकता दिइएको छ। प्राथमिक उपचारसहित आवश्यक स्वास्थ्य सेवा उपलब्ध गराइएको छ भने विभिन्न सङ्घ–संस्थाले निःशुल्क स्वास्थ्य शिविरसमेत सञ्चालन गरेका छन्।
देशभरका शिवालयमा उस्तै उत्साह
साउनको अन्तिम सोमबारको अवसरमा काठमाडौं उपत्यकाका अन्य प्रसिद्ध शिवालयमा पनि बिहानैदेखि भक्तजनको घुइँचो लागेको छ।
गोकर्णेश्वर, नागेश्वर, डोलेश्वर तथा वसन्तपुर दरबार क्षेत्रको ‘सानो पशुपतिनाथ’का रूपमा परिचित मक्खन महादेवलगायत ठूला–साना शिव मन्दिरमा समेत भक्तजनको लाम लागेको रासस प्रतिनिधिहरूले जनाएका छन्।
झरीका बीच पनि शिवालयहरूमा देखिएको भक्तजनको उत्साहले साउनको अन्तिम सोमबारको धार्मिक तथा सांस्कृतिक महत्त्वलाई थप उजागर गरेको छ।
