काठमाडौँ। मोरङको उर्लाबारी नगरपालिकाले तोकिएको समयभित्र निर्माण कार्य सम्पन्न नगर्ने ६ वटा निर्माण कम्पनीसँगको ठेक्का सम्झौता तोड्ने तयारी गरेको छ।
नगर कार्यपालिकाको कार्यालय उर्लाबारीले मंगलबार सार्वजनिक सूचना जारी गर्दै पटक–पटक सहजीकरण तथा मौखिक र लिखित रूपमा ताकेता गर्दा पनि निर्माण व्यवसायीहरूले काम सम्पन्न गर्न चासो नदेखाएको जनाएको छ।
नगरपालिकाले ठेक्का सम्झौता अन्त्य नगर्नुपर्ने र कारबाही प्रक्रिया अघि नबढाउनुपर्ने कुनै ठोस कारण भए प्रमाणसहित लिखित जवाफ लिएर आधिकारिक प्रतिनिधिलाई कार्यालयमा उपस्थित हुन भनेको छ।
सूचनामा तोकिएको १५ दिनभित्र मनासिब कारणसहित उपस्थित नभएमा सार्वजनिक खरिद ऐन, २०६३, सार्वजनिक खरिद नियमावली, २०६४ तथा खरिद सम्झौताका सर्तबमोजिम ठेक्का अन्त्य गरी नियमानुसार थप कारबाही अघि बढाइने चेतावनी दिइएको छ।
