काठमाडौँ । जाजरकोटको नलगाड नगरपालिका-१ र २ को सीमानामा रहेको बौलाह खोलामा गएराति परेको भीषण वर्षापछि आएको बाढीले व्यापक भौतिक क्षति पुर्याएको छ। बाढीका कारण स्थानीयवासीका घरटहरा तथा पसलहरू बगेका छन् भने यातायात सेवासमेत प्रभावित भएको छ।
जिल्ला प्रहरी कार्यालय जाजरकोटका सूचना अधिकारी सुधीर कुमार खड्काका अनुसार वडा नम्बर १ बैरीताल क्षेत्रमा बसोबास तथा व्यवसाय गर्दै आएका स्थानीयको भौतिक संरचनामा बाढीले क्षति पुर्याएको हो। आठ जना व्यवसायीका घर तथा अस्थायी टहराहरू बाढीले बगाएको छ। बाढीबाट सत्यदेव चनाराको पानीघट्ट तथा मानबहादुर विक, बबिता महरा, कृष्ण महर, मेघराज कुमाई, नन्दे महर र बलबहादुर विकका अस्थायी टहरा, किराना पसल, कपडा पेल्ने मेसिन तथा दानासहितका टहराहरू पूर्ण रूपमा बगेका छन्।
यस्तै जनक भण्डारीको फ्रेस हाउस र त्यहाँ रहेका एक सय वटा बोइलर कुखुरा बाढीले बगाएर पूर्ण क्षति पुगेको छ भने दले कामीको किराना पसलमा हिलो र पानी पसेर आंशिक क्षति भएको छ। बाढीले छवि महरको अटो (भे १ ह २६३३) र हिरालाल घर्तीको ट्याक्टर (ग १ त ७२७८) लाई माटो तथा हिलोले पुरेको छ।
बाढीका कारण भेरी करिडोरअन्तर्गतको जाजरकोट-डोल्पा सडक खण्ड पूर्ण रूपमा ठप्प बनेको छ। सडक अवरुद्ध हुँदा आवतजावतमा सास्ती भएको छ। यद्यपि, समयमै सतर्कता अपनाइएकाले कुनै मानवीय क्षति भने नभएको प्रहरीले जनाएको छ।
