काठमाडौँ । बाढी पूर्वानुमान महाशाखाले सोमबार विशेष बुलेटिन जारी गर्दै आगामी तीन दिन देशभरीका प्रमुख तथा साना नदीहरूमा जलसतह उल्लेख्य बढ्ने सम्भावना औंल्याएको छ। हाल कोशी, नारायणी, बागमती, कर्णाली, महाकाली लगायत कन्काई, कमला, बबई र राप्ती नदीहरूमा बहाव सतर्कता तहभन्दा तलै रहे तापनि आगामी दिनमा बाढीको जोखिम उच्च हुने अनुमान गरिएको छ।
महाशाखाका अनुसार आगामी तीन दिनसम्म कोशी र नारायणी जलाधार क्षेत्रका सप्तकोशी, तमोर, अरुण, दुधकोशी, तामाकोशी, सुनकोशी, त्रिशुली, बुढीगण्डकी, मर्स्याङ्दी, सेती, कालिगण्डकी र देवघाटस्थित नारायणी नदीमा पानीको सतह निकै बढ्नेछ। यसैगरी सुदूरपश्चिमको महाकाली नदीमा पनि बहाव उल्लेख्य रूपमा बढ्ने देखिएको छ भने कर्णाली, बागमती, कन्काई, कमला, बबई र राप्ती नदीहरूमा जलसतह सामान्य रूपमा वृद्धि हुनेछ।
२१ जिल्लाका साना नदीमा आकस्मिक बाढीको चेतावनी
आज संखुवासभा, सिन्धुपाल्चोक, काभ्रेपलाञ्चोक, काठमाडौँ उपत्यकाका तीनै जिल्ला (काठमाडौँ, भक्तपुर, ललितपुर), गोरखा, तनहुँ, लमजुङ, कास्की, पर्वत, बागलुङ, म्याग्दी, जाजरकोट, दैलेख, सुर्खेत, कालिकोट, हुम्ला, बझाङ र बाजुरा भई बहने साना नदीहरूमा बहाव तीव्र भई आकस्मिक बाढीको मध्यम जोखिम रहने पूर्वानुमान छ।
भोलि सुदूरपश्चिम, लुम्बिनी र मधेस प्रदेशका केही साना नदीहरूमा अचानक बहाव बढ्न सक्नेछ। त्यसैगरी पर्सि कोशी र मधेस प्रदेश भई बहने साना खोला तथा नदीहरूमा आकस्मिक बाढी आउने सम्भावना रहेकाले तटीय तथा आसपासका क्षेत्रमा उच्च सतर्कता अपनाउन महाशाखाले आग्रह गरेको छ।
