काठमाडौं । नेपाल आयल निगमले पेट्रोलियम पदार्थको हाल कायम खुद्रा बिक्री मूल्यलाई निरन्तरता दिने भएको छ। इण्डियन आयल कर्पोरेसन (आईओसी) बाट खरिद मूल्य बढेर आए पनि उपभोक्तालाई तत्काल थप भार नपार्ने निर्णय निगमले गरेको हो।
भदौ ३० गते प्राप्त नयाँ खरिद मूल्यअनुसार पेट्रोलको मूल्य प्रतिलिटर १२ रुपैयाँ ४० पैसा र डिजेलको ४ रुपैयाँ ६८ पैसा बढेको निगमले जनाएको छ। तर, भोटेकोशी नदीको बाढीपछि सिर्जित परिस्थितिलाई ध्यानमा राख्दै भदौ ३१ गतेदेखि लागू हुने गरी खुद्रा मूल्य यथावत् राखिएको हो।
अन्तर्राष्ट्रिय बजारमा पेट्रोलियम पदार्थको मूल्य बढिरहे पनि स्वचालित मूल्य समायोजन नगर्दा आगामी १५ दिनमा करिब १ अर्ब ९१ करोड ६९ लाख रुपैयाँ घाटा हुने निगमको अनुमान छ।
निगमले अन्तर्राष्ट्रिय बजारको मूल्यअनुसार नियमित रूपमा समायोजन गर्दै आएको भए पनि विपद्पछिको अवस्थालाई मध्यनजर गर्दै यसपटक मूल्य वृद्धि नगर्ने निर्णय गरेको जनाएको छ।
