काठमाडौं । गोरखामा हुलाक सेवामार्फत घरमै राहदानी उपलब्ध गराउने व्यवस्था प्रभावकारी देखिएको छ। वैशाख १५ गतेदेखि सुरु भएको सेवामा ६०० जनाले घरमै राहदानी मगाउन आवेदन दिएकामा हालसम्म ५५० जनाले प्राप्त गरिसकेका छन्।
जिल्ला प्रशासन कार्यालय र जिल्ला हुलाक कार्यालयबीच भएको सहकार्यपछि प्रशासन कार्यालयमै हुलाकको काउन्टर राखेर सेवा दिइँदै आएको हो। राहदानीका लागि आवेदन दिने क्रममा सेवाग्राहीले कार्यालयबाट लिने वा आफ्नो ठेगानामै मगाउने विकल्प रोज्न सक्छन्।
५५ रुपैयाँको टिकटमै घरसम्म सेवा
घरमै राहदानी चाहने सेवाग्राहीको सम्पर्क र ठेगानासहितका विवरण हुलाक काउन्टरमा दर्ता गरिन्छ। काठमाडौंमा तयार भएको राहदानी जिल्ला प्रशासन कार्यालयमा आइपुगेपछि हुलाकमार्फत सम्बन्धित सेवाग्राहीलाई पठाइन्छ।
घरमै पुर्याउने सेवाका लागि ५५ रुपैयाँको हुलाक टिकटबाहेक थप शुल्क नलाग्ने कार्यालयले जनाएको छ। राहदानी हुलाक कार्यालयको जिम्मामा आएपछि सामान्यतया तीन दिनभित्र सम्बन्धित ठेगानामा पुर्याउने गरिएको छ।
दुर्गम क्षेत्रमा सेवा पुर्याउन चुनौती
चुमनुब्री र धार्चे गाउँपालिकामा समेत हुलाकमार्फत घरमै राहदानी पुर्याउने सेवा सञ्चालनमा छ। यद्यपि, चुमनुब्रीको केन्द्र फिलिमभन्दा माथिका बस्तीमा भौगोलिक विकटता, जनशक्ति र स्रोतसाधनको सीमितताका कारण सेवा विस्तार गर्न कठिनाइ रहेको कार्यालयले जनाएको छ।
पालुङटार, सहिदलखन र आरुघाट क्षेत्रका अधिकांश सेवाग्राहीले भने घरमै राहदानी बुझ्ने सेवा प्रयोग गरिरहेको जिल्ला हुलाक कार्यालयले जनाएको छ।
