काठमाडौं । बंगालको खाडीमा विकसित हुँदै गरेको न्यूनचापीय प्रणालीको प्रभावका कारण असोज ८ देखि १२ गतेसम्म नेपालमा वर्षाको गतिविधि उल्लेख्य रूपमा बढ्न सक्ने मौसमविद्हरूले बताएका छन्। केही पूर्वानुमान मोडलले देशका विभिन्न क्षेत्रमा भारीदेखि अति भारी वर्षाको सम्भावना देखाएका छन्।
त्रिभुवन विश्वविद्यालयका सहप्राध्यापक विनोद पोखरेलका अनुसार विभिन्न मौसम पूर्वानुमान प्रणालीले लगातार तीन–चार दिन वर्षाको संकेत गरेका छन्। लामो समय पानी पर्दा यसअघि नै भिजेको जमिन कमजोर भएकाले बाढी, पहिरो र डुबानको जोखिम बढ्न सक्ने भन्दै उनले समयमै पूर्वतयारी गर्न सुझाव दिएका छन्।
मौसमविद् रोजन लामिछानेका अनुसार बंगालको खाडीमा विकसित भइरहेको प्रणालीले चक्रवातको रूप लिने वा नलिने विषय अहिले नै निश्चित भइसकेको छैन। प्रणालीको दिशा र विकासक्रम परिवर्तन हुनसक्ने भएकाले नेपालमा वर्षाको मात्रा र प्रभावबारे थप निगरानी आवश्यक रहेको उनको भनाइ छ।
पूर्वानुमानअनुसार वर्षाको प्रभाव देशका धेरै भूभागमा देखिन सक्ने भए पनि केही मोडलले लुम्बिनी क्षेत्रमा तुलनात्मक रूपमा बढी वर्षाको संकेत गरेका छन्। लामो समयसम्म भारी वर्षा भएमा सडक यातायात, कृषि, पर्यटन तथा बाढीपहिरोको जोखिम भएका क्षेत्रमा थप असर पर्न सक्ने भएकाले सम्बन्धित निकाय र सर्वसाधारणलाई मौसमसम्बन्धी सूचनामा ध्यान दिन आग्रह गरिएको छ।
जल तथा मौसम विज्ञान विभागले विकसित हुँदै गरेको मौसमी प्रणालीलाई निरन्तर निगरानी गरिरहेको जनाएको छ। प्रणालीको अवस्था थप स्पष्ट भएपछि आवश्यक सूचना तथा विशेष बुलेटिन जारी गरिने विभागले जनाएको छ।
