काठमाडौं । लगातारको वर्षासँगै काठमाडौं उपत्यकाका नदीमा पानीको बहाव बढेपछि नदी तटीय क्षेत्र र करिडोरमा सुरक्षा निगरानी बढाइएको छ। देशका विभिन्न भागमा बाढी र पहिरोका कारण मुख्य सडक तथा राजमार्ग प्रभावित भइरहेका बेला उपत्यकामा पनि सतर्कता बढाइएको हो।
उपत्यका ट्राफिक प्रहरी कार्यालयका प्रवक्ता एसपी नरेशराज सुवेदीका अनुसार नदी किनार तथा करिडोरमा रोकिएका सवारीसाधन हटाउने काम भइरहेको छ। नेपाल प्रहरी, ट्राफिक प्रहरीलगायत सुरक्षा निकायले संयुक्त रूपमा तटीय क्षेत्रको अवस्था निगरानी गरिरहेका छन्।
बागमती र विष्णुमती करिडोरमा विशेष सावधानी
बागमती र विष्णुमती करिडोरमा अनावश्यक आवतजावत नगर्न तथा सम्भव भएसम्म ती सडक प्रयोग नगर्न सर्वसाधारणलाई आग्रह गरिएको छ।
ट्राफिक प्रहरीले नदीको जलस्तर र सडकको अवस्थाबारे निरन्तर निगरानी गरिरहेको जनाएको छ। यससम्बन्धी सूचना मेट्रो ट्राफिक एफएममार्फत पनि नियमित रूपमा प्रवाह भइरहेको छ।
