काठमाडौं । मनाङको हिम्लुङ हिमालमा खसेको हिमपहिरोमा परी सम्पर्कविहीन भएकाहरूको खोजी कार्य जारी छ। सोमबार बिहानैदेखि हेलिकप्टरमार्फत तीन जनाको टोली खोजीमा परिचालन गरिएको मनाङका सहायक प्रमुख जिल्ला अधिकारी कृष्णप्रसाद पौडेलले जानकारी दिए।
आइतबार नापाभूमि गाउँपालिका–५ स्थित ७ हजार १२६ मिटर अग्लो हिम्लुङ हिमालमा हिमपहिरो खसेको थियो। हिमपहिरोमा परी २७ जना सम्पर्कविहीन भएका थिए।
तीमध्ये ११ जना भने सम्पर्कमा आइसकेका छन्। उनीहरू पैदल हिँडेर आफैँ फुँ गाउँ आइपुगेका हुन्। घटनामा दुई जनाको शवसमेत फेला परेको छ भने अझै १४ जना सम्पर्कविहीन छन्।
हेलिकप्टरमार्फत खोजी, अनुभवी गाइड परिचालन
सम्पर्कविहीनहरूको खोजीका लागि अनुभवी गाइडहरूलाई समेत परिचालन गरिएको पौडेलले बताए। मौसम खुलेका कारण खोजी तथा उद्धार कार्यमा सहजता हुने अपेक्षा गरिएको उनको भनाइ छ।
हिमपहिरोमा फेला परेका दुई जनाको शव काठमाडौं पठाउने तयारी भइरहेको पौडेलले जानकारी दिए। खोजी कार्यलाई तीव्रता दिइएको र सम्पर्कविहीनहरूको अवस्थाबारे थप विवरण संकलन भइरहेको जनाइएको छ।
