काठमाडौं । भारतको जम्मू–कश्मीरस्थित कठुआमा केन्द्रीय औद्योगिक सुरक्षा बल (CISF) का एक जवानले सहकर्मीमाथि गोली चलाउँदा चार सुरक्षाकर्मीको मृत्यु भएको छ।
मंगलबार साँझ बसोहलीस्थित पावर प्रोजेक्टको सुरक्षामा खटिएका जवान अभिदेश कुमार सिंहले सरकारी एके–४७ राइफलबाट गोली चलाएको भारतीय सञ्चारमाध्यमले जनाएका छन्। घटनामा सहायक कमान्डेन्ट अंकित कुमार पाण्डे, सब–इन्स्पेक्टर लक्ष्मण सिंह तथा कन्स्टेबल रफिक अहमद र सन्दीप कुमारको मृत्यु भएको बताइएको छ।
घटनापछि प्रहरीले अभिदेशलाई नियन्त्रणमा लिएको छ। घटनाको कारण र परिस्थितिबारे अनुसन्धान भइरहेको छ भने CISF मुख्यालयले छानबिनका लागि कोर्ट अफ इन्क्वायरी गठन गर्ने प्रक्रिया अघि बढाएको छ।
भारतीय सञ्चारमाध्यमका अनुसार क्वार्टर गार्डमा परिवारलाई प्रवेश गराउने विषयमा भएको विवादपछि अभिदेश मेस सेक्सनमा पुगेका थिए। त्यही क्रममा उनले त्यहाँ रहेका सहकर्मीमाथि गोली चलाएको प्रारम्भिक विवरण छ।
भारतको गृह मन्त्रालयले केन्द्रीय सशस्त्र प्रहरी बलमा हुने यस्ता घटनामा व्यक्तिगत तथा पारिवारिक समस्या, कार्यस्थलको तनाव र विवादजस्ता कारण देखिने गरेको जनाएको छ। यस्ता घटनाको कारण अध्ययन गर्न मन्त्रालयले सन् २०२१ मा कार्यदलसमेत गठन गरेको थियो।
