काठमाडौं । श्रम संस्कृति पार्टीका सांसद हर्कराज राई (हर्क साम्पाङ) ले प्रधानमन्त्रीले प्रतिनिधिसभामा व्यक्त गरेको एक अभिव्यक्ति संसदको अभिलेखबाट हटाउन माग गरेका छन्।
सोमबार बसेको प्रतिनिधिसभा बैठकमा बोल्दै उनले उक्त अभिव्यक्तिलाई संसदीय रेकर्डबाट हटाउने माग यथावत् रहेको उल्लेख गर्दै सभामुखले आवश्यक निर्णय कहिले गर्ने हो भन्ने प्रतीक्षामा आफूहरू रहेको बताए।
बैठकमा सांसद राईले सीमा क्षेत्र सुस्तामा भारतीय सशस्त्र सीमा बल (एसएसबी) ले प्रवेश गरी अतिक्रमण प्रयास गरेको तथा स्थानीय नेपाली नागरिकलाई त्रास सिर्जना गर्ने गतिविधि भएको दाबी गर्दै सरकारको गम्भीर ध्यानाकर्षण गराए।
त्यसैगरी, माइतीघरमा प्रदर्शनरत राष्ट्रभक्त युवा अजय सोडारी र दीर्जन विकलाई पक्राउ गरी हिरासतमा राखिएको र उनीहरूविरुद्ध मुद्दा चलाउने तयारी भइरहेको भन्ने जानकारी आएको उल्लेख गर्दै उनले गृहमन्त्रीलाई यस विषयमा ध्यान दिन आग्रह गरे। साथै, उनले ती युवालाई अनावश्यक दुःख नदिन सरकारसँग अनुरोध गरे।
राईले एसईई परीक्षाका क्रममा विद्यार्थीका मोबाइल फोन जफत गरी नष्ट गरिएको घटनाप्रति पनि आपत्ति जनाउँदै यस्तो कार्यको आदेश दिने जिम्मेवार व्यक्तिमाथि कडा कारबाहीको माग गरे।
त्यसैगरी, एक महिलालाई टेम्पुबाट भीरमा खसालिएको भनिएको घटनाप्रति आफू गम्भीर रूपमा मर्माहत भएको उल्लेख गर्दै उनले उक्त घटनाको निष्पक्ष छानबिन गरी दोषीलाई कानुनी कारबाहीको दायरामा ल्याउन सरकारसँग माग गरे।
सांसद राईले घरमाथि ढुंगामुढा प्रहार गरिएको भिडियो सार्वजनिक भएको प्रसङ्ग उल्लेख गर्दै यस्ता घटनाको पनि निष्पक्ष अनुसन्धान आवश्यक रहेको बताए।
अन्त्यमा उनले मुलुकमा लोकतान्त्रिक मूल्य–मान्यताको संरक्षण र सुनिश्चितताका लागि सरकार थप जिम्मेवार बन्नुपर्ने धारणा राखे।
