काठमाडौँ । देशका सातवटै प्रदेश सरकारले आज आगामी आर्थिक वर्षका लागि बजेट सार्वजनिक गर्ने तयारी गरेका छन्। सोहीअनुसार कोशी प्रदेशले दिउँसो ४ बजे प्रदेशसभा बैठकमार्फत आफ्नो बजेट प्रस्तुत गर्ने भएको छ।
प्रदेशसभा बैठकमा आर्थिक मामिला तथा योजना मन्त्री विदुर लिङ्थेपले आगामी आर्थिक वर्षको बजेट पेस गर्ने कार्यक्रम रहेको छ। मन्त्रालय स्रोतका अनुसार कोशी प्रदेशको बजेट आकार करिब ४० अर्ब रुपैयाँ हाराहारी रहने अनुमान गरिएको छ।
गत आर्थिक वर्षमा प्रदेश सरकारले ३५ अर्ब ८७ करोड ९९ लाख रुपैयाँको बजेट विनियोजन गरेको थियो। मध्यावधि समीक्षापछि भने उक्त अनुमान घटाएर ३२ अर्ब ४५ करोड ६४ लाख रुपैयाँमा संशोधन गरिएको थियो।
आर्थिक वर्ष २०८३/८४ का लागि बजेटको स्रोत संघीय सरकारबाट प्राप्त हुने अनुदान, राजस्व बाँडफाँट तथा आन्तरिक आम्दानीलाई आधार बनाइएको छ। अनुदानतर्फ करिब १६ अर्ब ५० करोड रुपैयाँ र राजस्व बाँडफाँटबाट १३ अर्ब रुपैयाँ प्राप्त हुने अनुमान गरिएको छ। बाँकी रकम आन्तरिक स्रोत र संचित कोषबाट पूर्ति गरिने बताइएको छ।
नयाँ बजेटमा प्रदेश सरकारले प्रत्यक्ष निर्वाचित सांसदका लागि प्रत्येकलाई ४ करोड रुपैयाँ र समानुपातिक सांसदका लागि २ करोड ५० लाख रुपैयाँका दरले योजना समावेश गर्ने तयारी गरेको छ।
त्यसैगरी करिब ५ अर्ब रुपैयाँ बराबरका बहुवर्षीय नयाँ आयोजनाहरू पनि बजेटमा समेटिने अपेक्षा गरिएको छ।
