काठमाडौं । सुदूरपश्चिम प्रदेश सरकारले आगामी आर्थिक वर्ष २०८३/८४ का लागि रु ३७ अर्ब ७० करोडको बजेट सार्वजनिक गरेको छ। प्रदेशसभाको आइतबार राति ११ः४५ बजे बसेको बैठकमा आर्थिक मामिलामन्त्री विक्रमसिंह धामीले बजेट प्रस्तुत गरेका हुन्।
सरकारले आगामी आर्थिक वर्षको खर्च व्यवस्थापनका लागि विभिन्न स्रोतबाट राजस्व तथा अनुदान प्राप्त हुने अनुमान गरेको छ। बजेटका लागि आन्तरिक राजस्व परिचालनबाट रु एक अर्ब ७२ करोड, राजस्व बाँडफाँटमार्फत रु १० अर्ब २४ करोड ९२ लाख ६६ हजार तथा सङ्घीय रोयल्टीबाट रु सात करोड प्राप्त हुने अनुमान गरिएको छ।
यस्तै, नेपाल सरकारबाट वित्तीय समानीकरण अनुदानबापत रु नौ अर्ब छ करोड ३३ लाख, चालु आर्थिक वर्षको विनियोजनबाट बचत हुने रु नौ अर्ब ६२ करोड, सशर्त अनुदानबाट रु छ अर्ब तीन करोड ५८ लाख, सङ्घीय समपूरक अनुदानबाट रु ३८ करोड ३८ लाख तथा विशेष अनुदानबाट रु ५२ करोड ७६ लाख प्राप्त हुने प्रक्षेपण गरिएको मन्त्री धामीले जानकारी दिए।
मन्त्री धामीले बजेट भाषणका क्रममा चालु तथा पुँजीगत खर्चतर्फ गरिएको विनियोजनबारे पनि जानकारी गराएका थिए। यद्यपि, बजेट प्रस्तुतिका क्रममा प्रतिपक्षी दलका प्रदेशसभा सदस्यहरू बैठकमा सहभागी भएनन्।
बैठक सुरु हुनासाथ प्रतिपक्षी सांसदहरूले आ–आफ्नो स्थानबाट उठेर विरोध जनाएका थिए। सभामुख भीमबहादुर भण्डारीले दिएको समयमा बोल्दै प्रदेशसभा सदस्य मानबहादुर धामीले सरकारले समयमै बजेट प्रस्तुत गर्न नसक्नु प्रशासनिक कमजोरी र लाचारीपनको परिणाम भएको टिप्पणी गरे। त्यसलगत्तै प्रतिपक्षी दलका सबै सांसदहरूले बैठक बहिष्कार गर्दै बाहिरिएका थिए।
सत्तारुढ दलभित्रै बजेट बाँडफाँटको विषयमा सहमति जुट्न नसक्दा बजेट प्रस्तुतिमा ढिलाइ भएको बताइएको छ। चालु आर्थिक वर्ष २०८२/८३ का लागि प्रदेश सरकारले रु ३३ अर्ब ४७ करोड ६० लाख ४८ हजारको बजेट ल्याएको थियो।
