काठमाडौं । राष्ट्रिय प्रजातन्त्र पार्टी (राप्रपा) की सांसद खुश्बु ओलीले सामाजिक सञ्जालमार्फत आफूविरुद्ध गरिएको गालीगलौज, चरित्रहत्या, धम्की तथा घृणायुक्त अभिव्यक्तिको विषयमा नेपाल प्रहरीको साइबर ब्युरोमा औपचारिक उजुरी दर्ता गरेकी छन्।
ओलीका अनुसार संसद्मा उठाइएका जनसरोकारका विषयपछि सामाजिक सञ्जालमा आफूविरुद्ध संगठित रूपमा आक्रमण भएको थियो। सोही घटनालाई आधार बनाउँदै उनले कानुनी उपचारका लागि उजुरी दिएको बताएकी हुन्। उजुरीपछि साइबर ब्युरोले एक जनालाई पक्राउ गरी कानुनी प्रक्रिया अघि बढाइसकेको पनि उनले जानकारी दिएकी छन्।
सांसद ओलीले सामाजिक सञ्जालमा फैलाइएका धम्की, हिंसात्मक अभिव्यक्ति र दुर्व्यवहारप्रति “शून्य सहनशीलता” अपनाउने स्पष्ट धारणा राखेकी छन्। उनले अभिव्यक्ति स्वतन्त्रता लोकतन्त्रको आधार भए पनि त्यसको नाममा हुने घृणायुक्त टिप्पणी, चरित्रहत्या र धम्की स्वीकार्य नहुने बताएकी हुन्।
सामाजिक सञ्जालमार्फत जारी गरिएको आफ्नो विस्तृत भनाइमा उनले विगत केही सातादेखि टिकटक, फेसबुक, युट्युब र मेसेन्जरजस्ता माध्यममा संगठित रूपमा आक्रमण, गालीगलौज र हिंसात्मक धम्कीहरू बढेको उल्लेख गरेकी छन्। उनका अनुसार यस्ता अभिव्यक्तिहरू सयौं प्रयोगकर्ताबाट बढेर हजारौंसम्म पुगेका थिए।
ओलीले व्यक्तिगत रूपमा ज्यान मार्ने धम्की, बलात्कारसम्बन्धी चेतावनी तथा शारीरिक आक्रमणका संकेतसमेत प्राप्त भएको दाबी गर्दै त्यसका आधारमा केही दर्जन व्यक्तिविरुद्ध उजुरी दर्ता गरिएको स्पष्ट पारेकी छन्।
उनले सामाजिक सञ्जाल प्रयोगकर्ताहरूलाई लक्षित गर्दै आपत्तिजनक सामग्री हटाउन चेतावनीसमेत दिएकी छन् र अन्यथा कानुनी कारबाही भोग्न तयार रहन आग्रह गरेकी छन्। उनका अनुसार सामाजिक सञ्जालमा हुने घृणायुक्त व्यवहार रोक्न कडा कानुनी कार्यान्वयन आवश्यक छ।
सांसद ओलीले यस्ता घटनाले सामाजिक सञ्जालमा फैलिँदो अराजकता नियन्त्रण गर्न राज्य, नागरिक र सम्बन्धित निकाय सबै जिम्मेवार बन्नुपर्ने आवश्यकता औंल्याएकी छन्। साथै, गृहमन्त्री र साइबर ब्युरोले घटनामा देखाएको सक्रियताप्रति उनले आभार पनि व्यक्त गरेकी छन्।
