काठमाडौँ । चीनको औपचारिक चारदिने भ्रमणमा रहेका परराष्ट्रमन्त्री शिशिर खनाल र चिनियाँ कम्युनिस्ट पार्टी केन्द्रीय समितिका राजनीतिक ब्युरो सदस्य तथा विदेशमन्त्री वाङ यी बीच सोमबार बेइजिङ मा प्रतिनिधिमण्डलस्तरीय वार्ता भएको छ।
द्विपक्षीय सम्बन्ध र सहकार्यका प्राथमिक क्षेत्र
वार्तामा नेपाल–चीन सम्बन्धलाई पारस्परिक सम्मान, संवेदनशीलता र प्राथमिकताप्रतिको प्रतिबद्धताका आधारमा थप सुदृढ बनाउने विषयमा विस्तृत छलफल भएको जनाइएको छ। दुवै पक्षले पूर्वाधार, सीमा व्यवस्थापन, ऊर्जा, व्यापार–लगानी, कृषि, सूचना तथा प्रविधि, डिजिटलाइजेसन, पर्यटन, रासायनिक मल, पेट्रोलियम तथा प्राकृतिक ग्यास अन्वेषण, तथा जनस्तरका सम्बन्धजस्ता क्षेत्रमा सहकार्य विस्तार गर्ने सहमति व्यक्त गरेका छन्।
राजनीतिक प्रतिबद्धता र आपसी समर्थन
नेपाल पक्षले ‘एक चीन नीति’प्रति आफ्नो दृढ प्रतिबद्धता दोहोर्याउँदै नेपाली भूमि चीनविरुद्ध कुनै पनि गतिविधिका लागि प्रयोग हुन नदिने स्पष्ट पारेको छ।
त्यसैगरी चिनियाँ पक्षले नेपालको सार्वभौमसत्ता, भौगोलिक अखण्डता र स्वतन्त्रताप्रति समर्थन पुनः व्यक्त गर्दै सुशासन र आर्थिक विकाससम्बन्धी नेपाली प्राथमिकतामा निरन्तर सहयोग रहने आश्वासन दिएको छ।
कार्यान्वयन र बहुपक्षीय सहकार्यमा जोड
दुवै पक्षले यसअघि सहमति भएका कार्यक्रम तथा परियोजनाको छिटो कार्यान्वयनमा जोड दिएका छन्। साथै क्षेत्रीय तथा बहुपक्षीय मञ्चहरूमा साझा चासोका विषयमा सहकार्य विस्तार गर्ने सहमति पनि भएको नेपाल दूतावास, बेइजिङ ले जनाएको छ।
अन्य भेटघाट र कार्यक्रम
वार्तापछि मन्त्री खनाल विदेशमन्त्री वाङद्वारा आयोजित रात्रिभोजमा सहभागी भएका थिए। उनले सोही दिन चिनियाँ कम्युनिस्ट पार्टी केन्द्रीय समितिअन्तर्गत अन्तर्राष्ट्रिय विभाग प्रमुखसँग पनि भेटवार्ता गरेका थिए।
त्यसैगरी मन्त्री खनालले चाइनिज एकेडेमी अफ साइन्सेज अन्तर्गतको इन्स्टिच्युट अफ टिबेटियन प्लेटो रिसर्च को अवलोकन गरेका छन्। उनी भ्रमण सम्पन्न गरी बुधबार स्वदेश फर्किने कार्यक्रम छ।
