काठमाडौं । मधेस प्रदेशअन्तर्गत रौतहट जिल्लामा गत आर्थिक वर्षको तुलनामा चालु आर्थिक वर्षमा सडक दुर्घटना तथा मानवीय क्षति दुवैमा कमी आएको छ।
जिल्ला प्रहरी कार्यालय रौतहटका तथ्यांकअनुसार आर्थिक वर्ष २०८०/८१ मा सडक दुर्घटनामा ६५ जनाको मृत्यु भएको थियो भने चालु आर्थिक वर्षको हालसम्म ४८ जनाको ज्यान गएको छ।
ट्राफिक सप्ताहका अवसरमा बुधबार आयोजित कार्यक्रममा बोल्दै प्रमुख जिल्ला अधिकारी दिनेशसागर भुषालले नियमित तथा छड्के अनुगमन र कडाइका कारण सवारी व्यवस्थापनमा सुधार आएको बताए। उनले सडक सुरक्षा सुधारका लागि सचेतना र अनुशासन दुवै अपरिहार्य रहेको उल्लेख गरे।
जिल्ला प्रहरी कार्यालयका प्रमुख राजेन्द्र थापा मगरले भने अझै पनि हेल्मेट नलगाई तीव्र गतिमा मोटरसाइकल चलाउने, क्षमताभन्दा बढी भार बोक्ने तथा मदिरा र लागू पदार्थ सेवन गरेर सवारी चलाउने प्रवृत्ति कायमै रहेको कारण अपेक्षित परिणाम प्राप्त हुन नसकेको बताए।
उनका अनुसार जिल्लामा हाल ५० देखि ६० जना ट्राफिक प्रहरी आठवटा कार्यालयमार्फत कार्यरत छन्। सीमित जनशक्ति र स्रोतका बाबजुद सरोकारवाला निकायसँग समन्वय गरेर ट्राफिक व्यवस्थापन भइरहेको उनले बताए।
प्रहरीका अनुसार विशेषगरी भित्री सडक र सीमावर्ती क्षेत्रमा भारतीय नम्बर प्लेटका सवारीसाधनको आवागमनले समेत व्यवस्थापनमा चुनौती थपिरहेको छ। यसले ट्राफिक नियन्त्रणलाई थप प्रभावकारी बनाउन चुनौतीपूर्ण बनेको सुरक्षा निकायको भनाइ छ।
