काठमाडौं । प्रतिनिधिसभाको बैठक आज बिहान ११ बजे बस्ने भएको छ। संसद् सचिवालयले सार्वजनिक गरेको कार्यसूचीअनुसार बैठकमा आर्थिक तथा कानुनी महत्वका विभिन्न विधेयक र अध्यादेशसम्बन्धी प्रस्तावहरू प्रस्तुत गरिनेछन्।
बैठकमा अर्थमन्त्री डा. स्वर्णिम वाग्लेले आर्थिक विधेयक, २०८३ र राष्ट्र ऋण उठाउने विधेयक, २०८३ पेश गर्ने कार्यसूची रहेको छ। आगामी आर्थिक वर्षको राजस्व व्यवस्थापन तथा सरकारी वित्तीय स्रोत परिचालनसँग सम्बन्धित यी विधेयकहरू संसद्मा प्रस्तुत हुनेछन्।
यसैबीच, सांसद खडकबहादुर बुढाले सार्वजनिक खरिद (दोस्रो संशोधन) अध्यादेश, २०८३ लाई अस्वीकार गरियोस् भन्ने प्रस्ताव निर्णयार्थ प्रस्तुत गर्नेछन्। उक्त अध्यादेशमाथि संसद्मा पक्ष र विपक्षमा छलफल हुने अपेक्षा गरिएको छ।
प्रधानमन्त्री बालेन्द्र शाहका तर्फबाट कानुन, न्याय तथा संसदीय मामिलामन्त्री सोबिता गौतमले सार्वजनिक खरिद (दोस्रो संशोधन) अध्यादेश, २०८३ लाई स्वीकृत गरियोस् भन्ने प्रस्ताव पेश गर्ने कार्यक्रम रहेको छ।
त्यसैगरी, सांसद नीता घतानीले सम्पत्ति शुद्धीकरण (मनी लाउन्डरिङ) निवारण (तेस्रो संशोधन) अध्यादेश, २०८३ लाई अस्वीकार गरियोस् भन्ने प्रस्ताव प्रस्तुत गर्ने कार्यसूची छ।
आजको बैठकमा आर्थिक व्यवस्थापन, सार्वजनिक खरिद प्रणाली तथा सम्पत्ति शुद्धीकरणसम्बन्धी कानुनी व्यवस्थालाई लिएर महत्वपूर्ण संसदीय बहस हुने अपेक्षा गरिएको छ।
