काठमाडौं । काठमाडौं सहित देशका विभिन्न जिल्लामा प्रहरीले सञ्चालन गरेको लागूऔषध नियन्त्रण अभियानका क्रममा ठूलो मात्रामा लागुऔषधसहित २९व्यक्ति पक्राउ परेका छन्।
काठमाडौंमा मात्रै छुट्टाछुट्टै स्थानबाट गरिएको कारबाहीमा ट्रामाडोल ट्याब्लेट, गाँजा र अन्य नियन्त्रित औषधिसहित विभिन्न उमेर समूहका व्यक्तिहरू नियन्त्रणमा लिइएको प्रहरीले जनाएको छ। गोकर्णेश्वर, जोरपाटी र बालाजु क्षेत्रबाट ट्रामाडोलसहित केही युवाहरू पक्राउ परेका छन् भने मित्रपार्क क्षेत्रबाट अवैध पदार्थसहित केही व्यक्तिहरू पक्राउ गरिएको हो।
यसैगरी उपत्यकाबाहिर पनि व्यापक कारबाही गरिएको छ। पाँचथर, मोरङ, झापा, रुपन्देही, मकवानपुर, कास्की, कपिलवस्तु, कैलाली, बर्दिया र कञ्चनपुरमा गरिएको छुट्टाछुट्टै अपरेसनमा ब्राउनसुगर, हेरोइन, अफिम, गाँजा तथा विभिन्न नियन्त्रित औषधिहरू बरामद गरिएको छ।
मोरङ र झापामा गरिएको कारबाहीमा सीमा नजिकबाट भारतबाट नेपालतर्फ प्रवेश गरिरहेका व्यक्तिहरू समेत पक्राउ परेका छन्। बर्दियामा अफिम जस्तो देखिने ठूलो परिमाणको पदार्थसहित तीन जना नियन्त्रणमा परेका छन् भने कास्कीमा इन्जेक्सनजन्य लागूऔषधसहित एक युवती पक्राउ परेकी छन्।
प्रहरीका अनुसार धेरैजसो घटनामा मोटरसाइकल, स्कुटर तथा व्यक्तिगत कोठाबाट लागूऔषध फेला परेको छ। नियन्त्रणमा लिइएका सबै व्यक्तिमाथि आवश्यक अनुसन्धान भइरहेको जनाइएको छ।
प्रहरीले लागूऔषध ओसारपसार तथा बिक्रीवितरणविरुद्धको अभियानलाई थप कडाइका साथ अघि बढाइने जनाएको छ।
