काठमाडौं । सरकारले देशभरका महिला तथा बालिकाहरूका लागि सुरक्षित, सहज र सम्मानजनक सार्वजनिक यातायात सेवा उपलब्ध गराउने उद्देश्यसहित सातै प्रदेशमा निःशुल्क ‘ब्लु बस’ सेवा सञ्चालन गर्ने तयारी अघि बढाएको छ।
भौतिक पूर्वाधार तथा यातायात मन्त्रालयले सरकारको १०० दिने विशेष कार्ययोजना अन्तर्गत यस परियोजनालाई प्राथमिकताका साथ अघि बढाएको जनाएको छ। प्रारम्भिक चरणमा आगामी १०० दिनभित्र देशभर कम्तीमा २५ वटा सुविधासम्पन्न ‘ब्लु बस’ सञ्चालन गर्ने लक्ष्य राखिएको छ।
काठमाडौंमा साझा यातायातसँग सहकार्य
मन्त्रालयका अनुसार काठमाडौं उपत्यकामा साझा यातायातसँगको प्राविधिक तथा व्यवस्थापकीय सहकार्यमा कम्तीमा सातवटा ‘ब्लु बस’ सञ्चालनमा ल्याइनेछ। उपत्यकाबाहिरका सातै प्रदेशमा भने स्थानीय यातायात व्यवसायी संघहरूसँग समन्वय गरी थप १८ वटा बस सञ्चालनको तयारी भइरहेको छ।
मन्त्रालयका प्रवक्ता रामहरि पोखरेलका अनुसार सार्वजनिक यातायातमा महिला तथा बालिकामाथि हुने असुरक्षा र दुव्र्यवहार न्यूनीकरण गर्न यो सेवा महत्वपूर्ण कदम हुने अपेक्षा गरिएको छ।
सेवा विस्तारको योजना
प्रवक्ता पोखरेलका अनुसार प्रारम्भिक चरणमा २५ वटा बस सञ्चालन गरिए पनि आगामी आर्थिक वर्षको बजेटमार्फत यो सेवा सातै प्रदेशका प्रमुख सहरहरूमा विस्तार गर्ने योजना रहेको छ।
सेवा सञ्चालनका लागि आवश्यक कार्यविधि, समय तालिका, लागत अनुमान तथा सञ्चालन मोडालिटीसम्बन्धी प्रस्ताव साझा यातायातबाट प्राप्त भइसकेको मन्त्रालयले जनाएको छ। उक्त प्रस्तावको प्राविधिक तथा कानुनी अध्ययनपछि अन्तिम स्वीकृतिका लागि मन्त्रीस्तरीय निर्णयमा पेस गरिएको छ।
सुरक्षित सार्वजनिक यातायाततर्फ नयाँ मापदण्ड
मन्त्रालयले ‘ब्लु बस’ सेवा मात्र नभई अन्य सार्वजनिक यातायातलाई समेत प्रविधिमैत्री, सुरक्षित र यात्रुमैत्री बनाउने उद्देश्यले नयाँ मापदण्डको मस्यौदा तयार गरी स्वीकृतिको प्रक्रियामा अघि बढाइएको जनाएको छ।
