काठमाडौं । इरानसँगको जारी द्वन्द्वका कारण बढ्दो सैन्य खर्च व्यवस्थापन गर्न ह्वाइट हाउसले अमेरिकी कङ्ग्रेससँग करिब ८७ अर्ब ६० करोड अमेरिकी डलरको अतिरिक्त बजेट प्रस्ताव गरेको छ। राष्ट्रपति डोनाल्ड ट्रम्पको इरान नीतिमाथि कङ्ग्रेसमा विवाद चुलिँदै गएको अवस्थामा यो प्रस्ताव आएको हो।
प्रस्तावअनुसार ‘अपरेसन एपिक फ्युरी’ का आवश्यकताहरू पूरा गर्न रक्षा मन्त्रालयका लागि करिब ७० अर्ब डलर छुट्याइएको छ। यस रकमले सैन्य तयारी, हतियार पुनःभण्डारण, सञ्चालन खर्च तथा गोप्य कार्यक्रमहरू समेट्ने जनाइएको छ।
त्यसैगरी इबोला नियन्त्रणका लागि १.४ अर्ब डलर, अमेरिकी कृषक सहयोगका लागि ११ अर्ब डलर, तथा वासिङ्टन डीसी र आसपासका पूर्वाधार परियोजनाका लागि ५० करोड डलर विनियोजनको प्रस्ताव गरिएको छ। न्युयोर्कस्थित पेन स्टेसन पुनर्निर्माणका लागि थप १ अर्ब डलर माग गरिएको छ।
युद्ध खर्च र नीतिगत विवादका बीच यो प्रस्तावले कङ्ग्रेसमा थप राजनीतिक बहस चर्काउने देखिएको छ। केही सांसदहरूले अतिरिक्त सैन्य खर्चप्रति असन्तुष्टि जनाइरहेका छन्।
यसैबीच अमेरिकी सिनेटले युद्ध अधिकारसम्बन्धी प्रस्ताव पारित गर्दै राष्ट्रपति ट्रम्पलाई कङ्ग्रेसको स्वीकृतिबिना थप सैन्य कारबाही गर्न नपाउने व्यवस्था गरेको छ। उक्त मतदानमा केही रिपब्लिकन सांसदहरू पनि डेमोक्रेटसँगै उभिएपछि ट्रम्पले उनीहरूको आलोचना गरेका छन्।
