काठमाडौँ । ओमानस्थित नेपाली राजदूतावासले नेपाल र ओमानबीच व्यापार, लगानी, पर्यटन तथा रोजगारीका अवसर प्रवर्द्धन गर्ने उद्देश्यले ‘समृद्धिका लागि आर्थिक साझेदारी’ शीर्षकमा विशेष कार्यक्रम आयोजना गरेको छ।
बुधबार आयोजित कार्यक्रममा विभिन्न कम्पनी तथा सुपरमार्केटका प्रमुख कार्यकारी अधिकृत, निर्देशक, प्रबन्धक, सञ्चारकर्मी, नेपाली उद्यमी तथा ओमानस्थित नेपाली समुदायका प्रतिनिधिसहित १०० भन्दा बढी व्यक्तिहरूको सहभागिता रहेको थियो।
कार्यक्रममा ओमानका लागि नेपालका राजदूत डोरनाथ अर्यालले नेपालमा व्यापार, लगानी र पर्यटनका प्रशस्त सम्भावना रहेको उल्लेख गर्दै वैदेशिक लगानीका प्राथमिक क्षेत्रबारे विस्तृत जानकारी दिएका थिए। उनले ओमानी लगानीकर्तालाई नेपालमा उपलब्ध अवसरहरूको अध्ययन र उपयोग गर्न आग्रह गर्दै नेपाल भारत र चीनजस्ता तीव्र गतिमा विकासोन्मुख दुई ठूला अर्थतन्त्रबीच अवस्थित भएकाले व्यापार, लगानी र पर्यटनका लागि महत्वपूर्ण सेतु बन्न सक्ने बताए।
त्यस अवसरमा कर्पोरेट तथा मुद्दा मामिलासम्बन्धी अधिवक्ता खावला मोहम्मद अल सदुनीले ओमानको श्रम ऐन तथा नियमावलीका व्यावहारिक पक्ष, श्रमिक–रोजगारदाता सम्बन्ध, कानुनी व्यवस्था तथा श्रम विवाद समाधानका उपायबारे प्रस्तुति दिएका थिए।
कार्यक्रममा नेपालको प्राकृतिक सौन्दर्य, सांस्कृतिक विविधता र पर्यटन सम्भावनालाई उजागर गर्ने भिडियोसमेत प्रदर्शन गरिएको थियो। सहभागीहरूलाई नेपाल र ओमानबीच व्यापार, लगानी तथा पर्यटन क्षेत्रमा सहकार्य विस्तार गर्न प्रोत्साहित गरिएको दूतावासले जनाएको छ।
