काठमाडौं । दाङमा भूमिहीन, सुकुम्बासी तथा अव्यवस्थित बसोबासीहरूको पक्षमा बृहत् प्रदर्शन गरिएको छ। ‘बस्न दे सरकार, बाँच्न दे सरकार’ अभियानअन्तर्गत आयोजित प्रदर्शनमा सहभागीहरूले वैकल्पिक व्यवस्था नगरी बस्ती हटाउने सरकारी कदमको विरोध गरेका छन्।
नेपाल भूमिहीन सुकुम्बासी तथा अव्यवस्थित बसोबासी संरक्षण समितिको आयोजनामा भएको प्रदर्शनमा सरकारले विभिन्न स्थानमा सञ्चालन गरिरहेको विस्थापन अभियान र डोजर प्रयोगप्रति असन्तुष्टि व्यक्त गरिएको थियो। प्रदर्शनकारीहरूले भूमिहीन नागरिकहरूको स्थायी व्यवस्थापन तथा लालपुर्जा वितरणको मागसमेत गरेका छन्।
आन्दोलनकारीहरूले काठमाडौँस्थित होल्डिङ सेन्टरमा रहेका सुकुम्बासीहरूलाई उचित आवासको व्यवस्था नगरी हटाउने निर्णय फिर्ता लिन आग्रह गरेका छन्। माग सम्बोधन नभए आन्दोलनलाई थप सशक्त बनाइने चेतावनी पनि दिइएको छ।
यस अभियानप्रति स्वतन्त्र नागरिक अभियान नेपालले समेत ऐक्यबद्धता जनाएको छ।
