काठमाडौं । बेलायती राजा चार्ल्स तृतीयले आफ्नो व्यक्तिगत कर विवरण सार्वजनिक गर्ने तयारी गरेका छन्, जसलाई राजतन्त्रमा पारदर्शिता बढाउने महत्वपूर्ण कदमका रूपमा हेरिएको छ।
बकिङ्घम दरबारले सार्वभौम अनुदानसम्बन्धी वार्षिक प्रतिवेदनसँगै उक्त विवरण सार्वजनिक गर्ने तयारी गरेको हो। यससँगै राजा चार्ल्स व्यक्तिगत कर विवरण सार्वजनिक गर्ने पहिलो बेलायती राजा बन्ने अपेक्षा गरिएको छ।
गत वर्ष दरबारले ८ करोड ६३ लाख पाउन्ड खर्च विवरणसहित १५९ पृष्ठको प्रतिवेदन सार्वजनिक गरेको थियो। राजपरिवारका आर्थिक गतिविधिमा पारदर्शिताको माग बढ्दै गएको सन्दर्भमा यो निर्णय आएको बताइएको छ।
राजा चार्ल्सले वेल्सका राजकुमार रहँदा पनि कर विवरण सार्वजनिक गर्दै आएका थिए। करिब ६८ करोड पाउन्ड सम्पत्तिका मालिक मानिने उनी कानुनी रूपमा कर तिर्न बाध्य नभए पनि स्वेच्छिक रूपमा कर तिर्दै आएका छन्।
यो कदमलाई बेलायती राजतन्त्रलाई अझ पारदर्शी र जवाफदेही बनाउने प्रयासका रूपमा लिइएको छ।
