काठमाडौं । रोल्पा जिल्लाका १० वटै स्थानीय तहले आगामी आर्थिक वर्ष २०८३/८४ का लागि कुल करिब ५ अर्ब १५ करोड रुपैयाँ बराबरको बजेट सार्वजनिक गरेका छन्। जिल्लामा एक नगरपालिका र नौ गाउँपालिका रहेका छन्। सबै स्थानीय तहहरूले विकास निर्माण, कृषि उत्पादन वृद्धि, रोजगारी सिर्जना, शिक्षा, स्वास्थ्य तथा पूर्वाधार विकासलाई प्राथमिकतामा राख्दै नीति तथा कार्यक्रमसहित बजेट प्रस्तुत गरेका हुन्।

पालिकागत बजेट विवरण

स्थानीय तह	बजेट रकम
रोल्पा नगरपालिका	रु ८० करोड २५ लाख ५० हजार
सुनिलस्मृति गाउँपालिका	रु ५८ करोड ५७ लाख ८० हजार
त्रिवेणी गाउँपालिका	रु ५२ करोड ४४ लाख ३४ हजार
परिवर्तन गाउँपालिका	रु ५२ करोड १३ लाख ७७ हजार
रुन्टीगढी गाउँपालिका	रु ५१ करोड ४२ लाख ७८ हजार
लुङ्ग्री गाउँपालिका	रु ४८ करोड ८४ लाख
गंगादेव गाउँपालिका	रु ४७ करोड ४४ लाख ३४ हजार
थवाङ गाउँपालिका	रु ४३ करोड ५२ लाख १५ हजार
सुनछहरी गाउँपालिका	रु ४१ करोड ६३ लाख ७२ हजार
माडी गाउँपालिका	रु ३९ करोड २४ हजार

प्राथमिकता क्षेत्र

स्थानीय तहहरूले प्रस्तुत गरेका बजेटमा कृषि तथा पशुपालनको व्यवसायीकरण, पर्यटन प्रवर्द्धन, स्थानीय सडक सञ्जाल विस्तार, खानेपानी सुविधा सुधार, तथा शिक्षा र स्वास्थ्य सेवाको गुणस्तर उन्नयनलाई मुख्य प्राथमिकतामा राखिएको छ।

त्यसैगरी युवालाई स्वदेशमै रोजगारी तथा स्वरोजगारका अवसर सिर्जना गर्ने कार्यक्रमहरूलाई पनि बजेटमा समेटिएको छ। महिला, बालबालिका, ज्येष्ठ नागरिक, दलित तथा विपन्न समुदाय लक्षित कार्यक्रमलाई निरन्तरता दिँदै सामाजिक सुरक्षालाई थप प्रभावकारी बनाउने प्रतिबद्धता स्थानीय तहहरूले जनाएका छन्।

नागरिकहरूले भने बजेटको आकारभन्दा यसको प्रभावकारी कार्यान्वयन र जनताले प्रत्यक्ष अनुभूति गर्ने परिणामलाई महत्वपूर्ण मान्नुपर्ने प्रतिक्रिया दिएका छन्।

Read More

काठमाडौं । आफ्नै श्रीमतीको हत्या गरी फरार रहेका एक पुरुषलाई रौतहट प्रहरीले पक्राउ गरेको छ।

फतुवा विजयपुर नगरपालिका–६ पेटभर्वा टोलका ४२ वर्षीय महन्थ राय यादवलाई प्रहरीले पक्राउ गरेको हो। उनले गत २०८२ साल फागुन ३ गते ३२ वर्षीया आफ्नी श्रीमती आरती देवी यादवलाई धारिलो हतियार (बन्चरो) प्रहार गरी हत्या गरेका थिए।

घटनापछि फरार रहेका यादवको खोजीमा जिल्ला प्रहरी कार्यालय रौतहट तथा मातहतका प्रहरी कार्यालयले निरन्तर अभियान चलाइरहेका थिए।

प्रहरीका अनुसार प्राविधिक विश्लेषण र विशेष सूचनाका आधारमा जिल्ला प्रहरी कार्यालय र इलाका प्रहरी कार्यालय लक्ष्मिनिया विजयपुरको संयुक्त टोलीले उनलाई फतुवा विजयपुर नगरपालिका–८ विजयपुरबाट पक्राउ गरेको हो।

Read More

काठमाडौं । युरोप यतिबेला इतिहासकै भीषण गर्मी र लुको चपेटामा परेको छ। फ्रान्स, इटाली, बेलायत र स्पेनलगायतका देशहरू अत्यधिक तापक्रमका कारण गम्भीर रूपमा प्रभावित भएका छन्।

फ्रान्समा मात्रै पछिल्लो बिहीबारयता गर्मीसँग सम्बन्धित घटना तथा नदी–तालमा पौडी खेल्ने क्रममा डुबेर ४० भन्दा बढीको मृत्यु भएको छ। फ्रान्सको मौसम विभागले ५८ क्षेत्रमा रेड अलर्ट र ३१ क्षेत्रमा ‘अरेन्ज अलर्ट’ जारी गरेको छ।

लान्देस क्षेत्रमा तापक्रम ४४.३ डिग्री सेल्सियससम्म पुगेको छ। अत्यधिक गर्मीका कारण ६८ हजार घरमा विद्युत आपूर्ति अवरुद्ध भएको तथा जंगलमा डढेलो फैलिएको जनाइएको छ।

फ्रान्सका श्रममन्त्रीले देशको अवस्थाप्रति चिन्ता व्यक्त गर्दै फ्रान्स पनि अब ‘तातो देश’ बनेको टिप्पणी गरेका छन्।

छिमेकी इटालीमा पनि राजधानी रोमसहित १६ प्रान्तका प्रमुख सहरहरूमा रेड अलर्ट जारी गरिएको छ। युरोपका अन्य देशहरूमा पनि गर्मी लहरको असर बढ्दै गएको अधिकारीहरूले जनाएका छन्।

Read More

काठमाडौं । रौतहटको गुजरा नगरपालिका–५ हरिहरपुर टोलस्थित भित्री सडकखण्डमा मोटरसाइकल दुर्घटना हुँदा एक युवकको मृत्यु भएको छ भने अर्का युवक घाइते भएका छन्।

बुधबार साँझ कनकपुरबाट हरिहरपुरतर्फ जाँदै गरेको बा ९३ प ७५८८ नम्बरको मोटरसाइकलले बाख्रालाई ठक्कर दिँदा दुर्घटना भएको प्रहरीले जनाएको छ।

दुर्घटनामा मोटरसाइकल चालक चन्द्रपुर नगरपालिका–५ का २३ वर्षीय आमोद चौधरी र पछाडि सवार २४ वर्षीय दिपेश चौधरी गम्भीर घाइते भएका थिए।

उपचारका क्रममा चन्द्रपुर अस्पतालमा दिपेश चौधरीको मृत्यु भएको प्रहरीले जनाएको छ। गम्भीर घाइते आमोद चौधरीको उपचार भइरहेको छ।

Read More

काठमाडौं । उपराष्ट्रपति रामसहायप्रसाद यादव बुधबार साँझ रुसको राष्ट्रिय दिवसका अवसरमा यहाँ आयोजित स्वागत समारोहमा सहभागी भएका छन्।

कार्यक्रममा नेपालका लागि रुसी राजदूत अलेक्सेई भ्लादिमिरोभिच सुरोभ्त्सेभले असंलग्नता र पञ्चशीलका सिद्धान्तमा आधारित नेपालको परराष्ट्र नीतिलाई रुसले सधैँ उच्च सम्मान गर्ने गरेको बताए।

उनले नेपाल–रुस सम्बन्ध ७० वर्ष पूरा हुन लागेको उल्लेख गर्दै आगामी जुलाई २० मा कूटनीतिक सम्बन्ध स्थापना भएको ७०औँ वार्षिकोत्सव मनाइने जानकारी दिए।

राजदूत सुरोभ्त्सेभले नेपाल र रुसबीच पारस्परिक विश्वास, समझदारी र मैत्रीपूर्ण सम्बन्ध रहेको उल्लेख गर्दै आगामी दिनमा दुई देशबीचको सहकार्य अझ सुदृढ हुने विश्वास व्यक्त गरे।

Read More

काठमाडौं । अन्तर्राष्ट्रिय फुटबल महासंघ (फिफा) ले अखिल नेपाल फुटबल संघ (एन्फा) लाई निलम्बन गरेको छ।

फिफा काउन्सिल ब्युरोले बुधबार फिफा विधानको धारा १४ अनुसार अर्को सूचना नआएसम्मका लागि एन्फालाई निलम्बन गर्ने निर्णय गरेको हो।

निलम्बनसँगै एन्फाले फिफा विधानको धारा १३ अन्तर्गतका सबै सदस्यता अधिकार गुमाएको छ। अब निलम्बन कायम रहँदासम्म एन्फाका टोली तथा क्लबहरूले कुनै पनि अन्तर्राष्ट्रिय प्रतियोगितामा भाग लिन पाउने छैनन्।

त्यसैगरी एन्फा तथा त्यससँग सम्बन्धित पदाधिकारी वा सदस्यहरूले फिफा र एएफसीद्वारा सञ्चालन हुने विकास कार्यक्रम, तालिम तथा प्रशिक्षणमा समेत सहभागिता जनाउन नपाउने भएका छन्।

फिफाले आवश्यक परेमा फिफा काउन्सिल वा कंग्रेसको बैठकअघि नै यो निलम्बन फुकुवा गर्न सकिने व्यवस्था रहेको जनाएको छ।

Read More

काठमाडौं । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत नयाँ पदाधिकारी तथा केन्द्रीय सदस्य चयनका लागि मतदान जारी रहेको छ।

पार्टी केन्द्रीय निर्वाचन आयोगका अनुसार गएरातिदेखि मतदान सुरु भएको हो र आज दिउँसो १२ बजेसम्म पहिलो चरणको मतदान सञ्चालन हुनेछ।

हालसम्म करिब १,६०० भन्दा बढी प्रतिनिधिले मतदान गरिसकेका छन्। आयोग प्रमुख भुवन केसीका अनुसार पहिलो चरणमा केन्द्रीय सदस्य चयनका लागि ३८४ जनाको उम्मेदवारी परेको छ।

त्यसमध्ये खुलातर्फ २१० र भूगोलतर्फ १७४ उम्मेदवार छन्। सात प्रदेशबाट ३५ र खुलातर्फ ६४ गरी कुल ९९ केन्द्रीय सदस्य चयन हुने व्यवस्था गरिएको छ।

प्रदेशगत रूपमा सुदूरपश्चिमबाट १८, मधेशबाट २०, लुम्बिनीबाट ३१, कोशीबाट २०, कर्णालीबाट ३१, बागमतीबाट २७ र गण्डकीबाट २७ जनाको उम्मेदवारी परेको छ।

चितवनस्थित उद्योग सङ्घको प्रदर्शनी केन्द्रमा मतदान भइरहेको छ। पहिलो चरणको मतदान सकिएपछि दुई घण्टाभित्र नतिजा सार्वजनिक गरिने र त्यसपछि दोस्रो चरणको मतदान सुरु हुने आयोगले जनाएको छ।

Read More

काठमाडौं। भेनेजुएलाको उत्तर–मध्य क्षेत्रमा बुधबार लगातार दुई शक्तिशाली भूकम्प गएपछि राजधानी काराकाससहित विभिन्न क्षेत्रमा ठूलो क्षति भएको छ।

अमेरिकी भूगर्भ सर्वेक्षण (USGS) का अनुसार ७.२ र ७.५ म्याग्निच्युडका दुई भूकम्प ३९ सेकेन्डको अन्तरमा गएको हो। भूकम्पको केन्द्रबिन्दु काराकासबाट करिब १६० किलोमिटर पश्चिममा रहेको बताइएको छ।

USGS को प्रारम्भिक मूल्याङ्कनअनुसार ठूलो मानवीय क्षतिको जोखिम उच्च रहेको छ। १० हजारभन्दा बढी मृत्यु हुने सम्भावना ४४ प्रतिशत र एक लाखभन्दा बढी मृत्यु हुने सम्भावना ३० प्रतिशतसम्म रहेको अनुमान गरिएको छ। यद्यपि हालसम्म आधिकारिक रूपमा मृतक वा घाइतेको विवरण सार्वजनिक गरिएको छैन।

रोयटर्सका अनुसार भूकम्पपछि काराकासका धेरै भवनमा क्षति पुगेको तथा केही संरचना भत्किएका छन्। प्रभावित क्षेत्रमा खोज तथा उद्धार कार्य जारी रहेको छ। अस्पतालहरूलाई आपतकालीन अवस्थामा राखिएको छ भने अधिकारीहरूले नागरिकलाई सतर्क रहन आग्रह गरेका छन्।

यस भूकम्पलाई पछिल्ला दशकहरूमा भेनेजुएलामा आएको सबैभन्दा विनाशकारी प्राकृतिक घटनामध्ये एक मानिएको छ।

Read More

काठमाडौं । नेपाल चेम्बर अफ कमर्सले आगामी आर्थिक वर्षको मौद्रिक नीति लगानी, उत्पादन र निजी क्षेत्रमैत्री बनाउन नेपाल राष्ट्र बैंकलाई आग्रह गरेको छ।

चेम्बर अध्यक्ष कमलेशकुमार अग्रवाल नेतृत्वको टोलीले बुधबार गभर्नर डा. विश्वनाथ पौडेलसँग भेट गरी निजी क्षेत्रका समस्या समाधान हुने गरी नीति निर्माण गर्न सुझाव दिएको हो।

चेम्बरले सात प्रतिशत आर्थिक वृद्धिदर हासिल गर्न कर्जा प्रवाह २० प्रतिशतभन्दा बढी हुनुपर्ने, साथै एकल अङ्कको ब्याजदरलाई स्थायी नीति बनाउनुपर्ने माग गरेको छ। बैंकदर ५ प्रतिशतमा झार्न र ‘स्प्रेड दर’ ३.५ प्रतिशतमा सीमित गर्नुपर्ने सुझाव पनि दिइएको छ।

त्यसैगरी ‘चालु पुँजी कर्जा निर्देशिका २०७८’ खारेज गर्न, बैंक–पिच्छे फरक केवाईसी प्रक्रिया हटाई एकीकृत डिजिटल प्रणाली लागू गर्न तथा किस्ता तिर्न नसकेका उद्यमीलाई तत्काल कालोसूचीमा नराखी पुनर्तालिकीकरणको सुविधा दिन आग्रह गरिएको छ।

सम्पत्ति शुद्धीकरणसम्बन्धी व्यवस्थाले व्यवसायीमा त्रास सिर्जना गरेको भन्दै २०६४ सालअघि आर्जित सम्पत्तिको स्रोतमा व्यावहारिक दृष्टिकोण अपनाउन पनि सुझाव दिइएको छ।

रियल इस्टेट क्षेत्र चलायमान बनाउन ‘लोन टु भ्यालु रेसियो’ ८० प्रतिशत कायम गर्नुपर्ने चेम्बरको प्रस्ताव छ। मौद्रिक नीति मूल्य स्थिरतासँगै उत्पादन, लगानी र रोजगारी सिर्जनामा केन्द्रित हुनुपर्ने अध्यक्ष अग्रवालले बताएका छन्।

गभर्नर डा. पौडेलले निजी क्षेत्रको विकासप्रति नेपाल राष्ट्र बैंक सकारात्मक रहेको बताउँदै सुझावहरूलाई मौद्रिक नीतिमार्फत सम्बोधन गर्ने प्रतिबद्धता व्यक्त गरेका छन्।

Read More